Xəbərlər
MN: Fərrux kəndi və ətraf yüksəkliklərdəki mövqelərdə heç bir dəyişiklik baş verməyib
Azərbaycan ordusunun Fərrux ərəzisindən çıxması barədə Rusiya Müdafiə nazirliyinin yaydığı məlumatdan bir qədər sonra Azərbaycan Müdafiə Nazirliyi bu məlumatı təkzib edib. Nazirliyin martın 27-də yaydığı məlumatda deyilir ki, Azərbaycan Ordusunun Fərrux kəndi və ətraf yüksəskliklərdəki mövqelərində heç bir dəyişiklik baş verməyib.
"Azərbaycan Ordusunun ölkəmizin suveren ərazilərinin tərkib hissəsi olan Fərrux kəndi və ətraf yüksəkliklərdəki mövqelərində heç bir dəyişiklik baş verməyib. Azərbaycan Ordusunun bölmələrinin həmin mövqelərdən geri çəkilməsi haqqında məlumat həqiqəti əks etdirmir. Ordumuz əməliyyat şəraitinə tam nəzarət edir".
Nazirlik həmçinin Rusiya tərəfinin açıqlamasında atəşkəsin guya Azərbaycan tərəfindən pozulması barədə verilmiş məlumatın da həqiqətə uyğun olmadığını və Azərbaycan hərbçiləri arasında yaralanma halı qeydə alınmadğını bildirir.
"Bir daha xatırlatmaq istərdik ki, Azərbaycan ərazisində “Dağlıq Qarabağ” adlı inzibati ərazi vahidi yoxdur. Rusiya Müdafiə nazirliyinin 26 və 27 mart tarixli açıqlamalarında “Dağlıq Qarabağ” ifadəsinin işlədilməsi Azərbaycan Respublikasının beynəlxalq birlik, o cümlədən Rusiya Federasiyası tərəfindən tanınmış və qəbul edilmiş ərazi bütövlüyünə qarşı hörmətsizlikdir"
Müdafiə Nazirliyi Rusiyanın Müdafiə Nazirliyinə xatırlafır ki, fevral ayında Azərbaycanla və Rusiya prezidentləri arasında Mütəfiqlik Bəyannaməsini yara salır.
"Rusiya Federasiyası Müdafiə Nazirliyinə xatırlatmaq istərdik ki, 2022-ci il 22 fevral tarixində iki ölkə prezidentləri tərəfindən imzalanmış Müttəfiqlik qarşılıqlı fəaliyyəti haqqında Bəyannamənin birinci bəndində qeyd olunur ki, “Rusiya Federasiyası və Azərbaycan Respublikası öz münasibətlərini müttəfiqlik qarşılıqlı fəaliyyəti, iki ölkənin müstəqilliyinə, dövlət suverenliyinə, ərazi bütövlüyünə və dövlət sərhədlərinin toxunulmazlığına qarşılıqlı hörmət, eləcə də bir-birinin daxili işlərinə qarışmamaq, hüquq bərabərliyi və qarşılıqlı fayda, mübahisələrin dinc yolla həlli və güc tətbiq etməmək və ya güclə hədələməmək prinsiplərinə sadiqlik əsasında qururlar”.”.
Nazirliyin açıqlamasında daha sonra bəyannamənin 18-ci bəndini də bir daha xatırladılır. Qeyd olunur ki, Rusiya Müdafiə Nazirliyinin bu açıqlamaları Rusiya prezidenti tərəfindən imzalanmış bəyannaməyə hörmətsizlikdir.
"...18-ci bəndinə əsasən, Rusiya Federasiyası və Azərbaycan Respublikası beynəlxalq terrorçuluq, ekstremizm və separatçılıq təhdidlərinə, qarşı mübarizədə və onların neytrallaşdırılmasında səylərini birləşdirirlər. Rusiya Federasiyası Müdafiə Nazirliyi bu açıqlaması ilə eyni zamanda Rusiya Federasiyasının Prezidenti, Rusiya Silahlı Qüvvələrinin Ali baş komandanı Vladimir Vladimiroviç Putin tərəfindən də imzalanmış sözügedən bəyannaməyə də hörmətsizlik nümayiş etdirir"
Müdafiə Nazirliyi bir daha Rusiya Müdafiə nazirliyinə xatırladır ki, Azərbaycanın Xocalı rayonunda "Furux" adlı kənd yoxdur.
"Qeyd edilən kəndin adı FƏRRUXDUR. Ümid edirik ki, növbəti açıqlamalarda kəndin adı düzgün formada göstəriləcəkdir" Azərbaycan Müdafiə Nazirliyinin açıqlamasında vurğulanır.
***
Azərbaycan Fərruxdan öz bölmələrini çıxarıb-Rusiya Müdafiə Nazirliyi
"Danışıqların nəticələrinə əsasən, Azərbaycan tərəfi FURUX (Fərrux -AR.) yaşayış ərazisindən öz bölmələrinin çıxarılmasını həyata keçirib".
Martın 27-də Rusiya Müdafiə Nazirliyinin yaydığı məlumatda belə deyilir.
Nazirliyin məlumatında bir də atəşkəsin iki dəfə Azərbaycan silahlı qüvvələri tərəfindən pozulduğu vurğulanır. Həmçinin qeyd olunur ki, atışma nəticəsində hər iki tərəfdən iki nəfər yaralanıb.
Azərbaycan Müdafiə Nazirliyinin hələkə bu açıqlamaya münasibəti bəlli deyil.
***
"Azərbaycan Respublikası Müdafiə Nazirliyi Rusiya Federasiyası Müdafiə Nazirliyinin 2022-ci il 26 mart tarixli həqiqəti əks etdirməyən və birtərəfli açıqlaması ilə bağlı təəssüfünü bildirir".
Azərbaycanın müdafiə naziriyi Rusiya müdafiə nazirliyinin martın 26-da yaydığı məlumata verdiyi reaksiyada belə deyilir.
Məlumatda martın 25-də iki ölkənin müdafiə nazirləri telefon danışığı zamanı Rusiya sülhməramlı kontingentinin müvəqqəti yerləşdiyi Azərbaycan əraziləri boyunca yaranmış vəziyyət müzakirə edilib. Söhbət zamanı Azərbaycan tərəfi bəyan edib ki, məntəqələrdə mövqelərin və dislokasiya yerlərinin dəqiqləşdirilməsi aparılır.
"Lakin buna baxmayaraq martın 26-sı səhər saatlarında qeyri-qanuni erməni silahlı dəstələrinin üzvləri Azərbaycan Ordusunun bölmələrinə qarşı təxribat törətməyə cəhd göstərib. Dərhal görülən tədbirlər nəticəsində qeyri-qanuni erməni silahlı dəstələrinin üzvləri geri çəkilməyə məcbur edilib".
Müdafiə Nazirliyi bildirir ki, Azərbaycan 2020-ci il 10 noyabr tarixli üçtərəfli bəyanata sadiqdir və onun heç bir müddəasını pozmayıb.
"Təəssüflə qeyd edirik ki, həmin bəyanatın 4-cü bəndinə uyğun olaraq, Ermənistan ordusunun qalıqlarının və qeyri-qanuni erməni silahlı dəstələrinin Azərbaycan ərazilərindən tam olaraq çıxarılması indiyə qədər icra edilməmişdir. Buna görə bəyanatın müddəalarını pozan Azərbaycan deyil, məhz Ermənistandır".
Nazirliyin açıqlamasında bildirir ki, Rusiya Federasiyası Müdafiə Nazirliyinin bu açıqlaması ikitərəfli əlaqələrin mahiyyətinə və 2022-ci il 22 fevral tarixində iki ölkə arasında imzalanmış müttəfiqlik qarşılıqlı fəaliyyəti haqqında Bəyannaməyə ziddir.
Azərbaycan ərazisində “Dağlıq Qarabağ” adlı inzibati ərazi vahidi yoxdur. Açıqlamada qeyd edilən kəndin adı Furux deyil, Fərruxdur".
Nazirlik bildirir ki, "yuxarıda qeyd edilənlərlə əlaqədar Azərbaycan Respublikası Müdafiə Nazirliyi Rusiya Federasiyası Müdafiə Nazirliyini üçtərəfli bəyanatın müddəalarına uyğun olaraq Ermənistan ordusunun qalıqlarının və qeyri-qanuni erməni silahlı dəstələrinin Azərbaycanın beynəlxalq birlik tərəfindən tanınmış ərazilərindən tam olaraq çıxarılmasını təmin etməyi, Azərbaycan silahlı qüvvələrinin ölkəmizin suveren əraziləri daxilində hərəkətini təhrif edilmiş formada qələmə verməməyi, “Dağlıq Qarabağ” ifadəsi işlətməməyi və Azərbaycan ərazilərinin adını düzgün olaraq göstərməyi xahiş edir"-deyə Azərbaycan Müdafiə Nazirliyinin bəyanatında deyilir.
***
Rusiya müdafiə nazirliyinin məlumatından sonra Rusiyanın xarici işlər nazirliyi də tərəfləri təmkinli olmağa çağırıb.
"Biz tərəfləri təmkin nümayiş etdirməyə və mövcud üçtərəfli sazişlərə ən yüksək səviyyədə ciddi əməl olunmasını təmin etməyə çağırırıq"
****
"Martın 24-dən 25-dək Azərbaycan Respublikasının silahlı qüvvələri Rusiya, Azərbaycan və Ermənistan liderlərinin 9 noyabr 2020-ci il tarixli üçtərəfli bəyanatının müddəalarını pozaraq, Rusiya sülhməramlı kontingentinin məsuliyyət zonasına daxil olub. Dağlıq Qarabağ ərazisində müşahidə məntəqəsi qurub. “Bayraktar-TB 2” tipli pilotsuz uçuş aparatı Furux (Fərux-A.) yaşayış məntəqəsi ərazisində Dağlıq Qarabağ silahlı birləşmələrinin bölmələrinə 4 zərbə endirib".
Belə bir məlumat martın 26-da Rusiya Müdafiə Nazirliyinin Qarabağdakı Rusiya sülhməramlı kontingentinin fəaliyyəti haqqında dərc etdiyi bülletenində yer alıb.
Məlumatda deyilir ki, "hazırda Rusiya sülhməramlı kontingentinin komandanlığı vəziyyətin həlli və qoşunların ilkin mövqelərinə qaytarılması üçün tədbirlər görür. Qoşunların çıxarılması üçün Azərbaycan tərəfinə müraciət göndərilib".
Xatırlatma
Qarabağ münaqişəsi müasir mərhələdə 1988-ci ildə başlayıb. Daha sonra Ermənistan və Azərbaycan arasında silahlı toqquşmalar baş verib. 1994-cü ildə gerçəkləşən atəşkəs razılaşmasına qədər Azərbaycanın Dağlıq Qarabağ bölgəsi və ona bitişik 7 rayonu işğal edilmişdi. Amma 2020-ci ildə İkinci Qarabağ müharibəsi nəticəsində Azərbaycan Dağlıq Qarabağ bölgəsinin bir hissəsinə və ətraf 7 rayona nəzarəti bərpa edib. Həmin ilin 10 noyabr razılaşmasına (Azərbaycan, Ermənistan və Rusiya arasında) əsasən, döyüşlər dayandırılıb, Laçın dəhlizində və Qarabağda Rusiya sülhməramlıları yerləşdirilib. Keçmiş Dağlıq Qarabağ Muxtar Vilayətinin çox hissəsinin tanınmayan qurumun və Rusiya sülhməramlılarının nəzarətində qaldığı bildirilir.
Bütün xəbərləri izləyin
Hesablama Platası 65 milyon manatlıq pozuntu aşkarladığını bildirir
Azərbaycan Hesablama Palatası (HP) dövlət vəsaitlərinin istifadəsində 65 milyon manatlıq pozuntu aşkarladığını bildirir.
Bu barədə Palatanın 2025-ci ilin ilk yarsında fəaliyyətinə aid iyulun 29-da açıqlanan hesabatında qeyd edilir.
Məlumata görə, qurumun həyata keçirdiyi audit tədbirləri nəticəsində dövlət vəsaitlərinin istifadəsində ciddi nöqsanlar və hüquqpozmalara rast gəlinib.
Hesabata görə, ümumilikdə 65 milyon manatlıq pozuntu faktı qeydə alınıb ki, bunun da 17,8 milyon manatı birbaşa dövlət büdcəsinə zərər kimi qiymətləndirilib.
Büdcə vəsaitlərinin bəzi hallarda funksional təyinatından kənar istifadə olunduğu müəyyən edilib. Artıq xərclər əsasən nəqliyyat xidmətləri, hədiyyə alınması və beynəlxalq tədbirlərlə bağlı olub. Habelə qeyd edilir ki, bəzən satınalmalar üzrə qanunvericiliyin tələbləri pozulub -planlaşdırma sənədləri yerləşdirilməyib, müqavilələr vaxtında icra edilməyib.
105,1 milyon manatlıq təhrif
Həmçinin vurğulanır ki, Palata maliyyə hesabatlarında 105,1 milyon manatlıq təhrif müəyyən edib. Bu məbləğin 12,6 milyon manatı əhəmiyyətli təhrif kimi dəyərləndirilib.
Hesabata görə, uyğunsuzluqlar əsasən dövlət vəsaitlərinin uçotu və istifadə olunması zamanı mühasibat, hesabat sistemlərində yol verilmiş nöqsanlar nəticəsində yaranıb.
Qeyd olunur ki, bir sıra qurumlarda dövlət əmlakı, aktivlərinin real dəyəri uçota düzgün alınmayıb, gəlir və xərclər qeyri-dəqiq əks olunub.
Hesablama Palatası nöqsanların aradan qaldırılması və maliyyə nizam-intizamının gücləndirilməsi məqsədilə aidiyyəti qurumlara təkliflər təqdim edib.
Hesabatda pozuntu və uygunsuzluqlara yol verən qurumların adları çəkilməyib.
Azərbaycan Hesablama Platası 2001-ci ildən fəliyyət göstərir. Hər il Milli Məclisə hesabat verməli olan bu qurum dövlət büdcəsinin həm gəlirlərinə, həm də xərclərinə nəzarət etməlidir. Ölkə parlamentindən fərqli olaraq bəzi müxalif qüvvələr onun fəaliyyətini tam yetərli saymır. Onlar hesab edirlər ki, bu qurum büdcə vəsaitlərinin mənimsənilməsinə aid ciddi pozuntuların üzərinə qətiyyətlə gedə bilmir. Hərçənd, Palata rəhbərliyi belə fikirləri qəbul etmir.
UNICEF-in Azərbaycandakı nümayəndəsinin diplomatik fəaliyyəti başa çatır
Birləşmiş Millətlər Təşkilatının (BMT) Uşaq Fondunun (UNICEF) Azərbaycandakı nümayəndəsi Saja Farooq Abdullahın Azərbaycanda diplomatik fəaliyyəti başa çatır.
Xarici İşlər Nazirlyinin (XİN) iyulun 29-da yaydığı məlumata görə, bu münasibətlə nazir Ceyhun Bayramov Saja Farooq Abdullahı qəbul edib.
“Görüşdə Azərbaycan və BMT, o cümlədən UNICEF arasında mövcud əməkdaşlıq məsələləri nəzərdən keçirilib, Azərbaycanda, o cümlədən digər ölkələrdə həyata keçirilən birgə təşəbbüslərdən, layihələrdən bəhs olunub”, - məlumatda əlavə edilib.
Azərbaycanda son dövrlərdə bəzi beynəlxalq təşkilatların fəaliyyəti məhdudlaşdırılıb.
Məsələn, iyunun 17-də Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyası bildirdi ki, Beynəlxalq Qızıl Xaç Komitəsinin (BQXK) Azərbaycandakı Nümayəndəliyinin yaxın vaxtlarda fəaliyyətini dayandıracağı gözlənir. Amma həmin qurum, hələlik, bu məlumata münasibət bildirməyib.
Üstəlik, yerli saytların məlumatına görə, rəsmi Bakı hələ bu ilin əvvəlində BMT-nin dörd ofisinin - BMT İnkişaf Proqramı (UNDP), BMT Əhali Fondu (UNFPA), BMT-nin Qaçqınlar üzrə Ali Komissarlığı (UNHCR) və BMT Uşaq Fondunun (UNICEF) Azərbaycanda ofislərinin bağlanması təklifi ilə çıxış edib.
Artıq həmin nümayəndəliklərin bir çoxu ya Azərbaycanda fəaliyyətlərini dayandırıblar və yaxud dayandıracaqlarını açıqlayıblar.
Habelə vurğulanırdı ki, UNICEF-in Azərbaycandakı nümayəndəliyi fəaliyyətini mərhələli şəkildə dayandıracaq. Bu barədə məlumatları UNICEF-in Avropa və Mərkəzi Asiya üzrə Kommunikasiya İdarəsinin regional rəhbəri İrina Mazur AzadlıqRadiosuna da təsdiqləmişdi.
O bildirmişdi ki, bundan sonra UNICEF Azərbaycandakı tərəfdaşlarla əməkdaşlığı regional ofisi və baş qərargahı vasitəsilə davam etdirəcək.
UNICEF-in Azərbaycandakı Nümayəndəliyinin fəaliyyəti sentyabrın 3-dən etibarən dayandırılacaq. Bunu "Report"un sorğusuna cavab olaraq İ.Mazur bildirib.
Artıq bu məlumatlar Azərbaycanda bir çox sosial şəbəkə istifadəçilərinin narazılığı ilə müşahidə edilir. Onlar vurğulayırlar ki, Azərbaycanda onsuz da uşaq ölümləri yüksəkdir. Həmin şəxslərin narahatlıqlarına görə, UNICEF-in Azərbaycandakı fəaliyyətini mərhələli şəkildə dayandırması bu prosesə ancaq ziyan gətirəcək.
Rəsmi Bakı isə hesab edir ki, "Azərbaycan artıq yardım qəbul edən dövlətdən qlobal gündəliyə töhfə verən bir ölkəyə çevrilib".
Dünyanın 190 ölkəsində uşaq hüquqlarını dəstəkləyən və qoruyan təşkilat Azərbaycanda 1993-cü ildən fəaliyyyət göstərir.
Peskov: Trampın bəyanatı Moskvada 'qeydə alınıb', müharibə davam edir
Rusiya prezidentinin mətbuat katibi Dmitri Peskov deyib ki, ABŞ prezidenti Donald Trampın Ukrayna ilə sülh sazişinə nail olmaq üçün Rusiyaya verdiyi möhlətin qısaldılması barədə bəyanatını Moskvada "qeydə alıblar". O bildirib ki, Ukraynada "xüsusi hərbi əməliyyat davam edir". Moskva 2022-ci ilin fevralından Ukraynaya qarşı başlatdığı işğalçı müharibəsini "xüsusi hərbi əməliyyat" adlandırır.
Vladimir Putinin mətbuat katibi vurğulayıb ki, onun ölkəsi "sülh prosesinə sadiqliyini qoruyur", eyni zamanda isə sülh yolu ilə nizamlanma çərçivəsində öz maraqlarını təmin etməyə çalışır.
D.Tramp bir gün öncə deyib ki, Ukraynada atəşkəsdən ötrü Rusiyaya verdiyi 50 günlük möhləti qısaldaraq 10-12 günə salır. Trampın sözlərinə görə, Putinlə bağlı "çox məyusdur", əgər Moskva Kiyevlə sülh sazişinə nail olmursa, bu ayın əvvəlində tərəflərə verdiyi 50 günlük ilkin müddətin sonunu gözləməsinə "ehtiyac yoxdur".
Peskov Trampın "Putinlə sadəcə danışmaq naminə danışmaqda maraqlı olmadığı" barədə sözlərinə münasibət bildirərkən "hər hansı qiymətləndirmədən çəkinmək istədiyini" vurğulayıb.
O əlavə edib ki, Vladimir Putin və Donald Tramp arasında mümkün görüş məsələsi hazırda gündəmdə deyil.
Peskovun sözlərinə görə, Rusiya ABŞ ilə münasibətlərin qurulmasında maraqlıdır, lakin son dövrlərdə bu proses nəzərəçarpacaq dərəcədə ləngiyib.
Rusiyanın müttəfiqləri
Kremlin sözçüsü jurnalistlərin suallarını cavablandırarkən Şimali Koreya, İran və Çini Rusiyanın "müttəfiqləri" adlandırıb və bildirib ki, Moskva bu ölkələrlə "dünya nizamnına dair bir çox məsələdə ortaq baxışa malikdir".
Bu açıqlama Rusiya xarici işlər naziri Sergey Lavrovun bir gün əvvəl verdiyi bəyanatla ziddiyyət təşkil edir. Lavrov deyib ki, "tarixdə ilk dəfə olaraq" Rusiya Qərblə mübarizə aparır və bu mübarizədə heç bir müttəfiqi yoxdur.
Rusiya ilə Şimali Koreya arasında hərbi tərəfdaşlıq sazişi qüvvədədir və Şimali Koreya əsgərləri Ukraynaya qarşı müharibədə iştirak ediblər. İran və Çin isə Rusiyaya hərbi təyinatlı məhsullar daxil olmaqla, müxtəlif mallar tədarük edir. Bununla belə, həm Tehran, həm də Pekin bu münaqişədə birbaşa iştirak etmədiklərini vurğulayır.
NASA və 'Roskosmos' rəhbərləri 2018-ci ildən bəri ilk dəfə görüşəcəklər
"Roskosmos"un baş direktoru Dmitri Bakanov NASA rəhbərliyi ilə danışıqlar aparmaq üçün ABŞ-nin Hyuston şəhərinə gedib. Bu barədə Rusiya xəbər agentlikləri "Roskosmos"un mətbuat xidmətinə istinadən məlumat yayıb.
Bakanovun NASA administratoru vəzifəsini icra edən Şon Daffi ilə iyulun 31-nə planlaşdırılan görüşü iki ölkənin kosmik agentliklərinin rəhbərləri arasında 2018-ci ildən bəri ilk təkbətək görüş olacaq.
"İnterfaks"ın məlumatına görə, müzakirələrədə Beynəlxalq Kosmik Stansiyanın (ISS) istismar müddətinin uzadılması, qarşılıqlı uçuşların davam etdirilməsi və stansiyanın orbitdən çıxarılması prosesi müzakirə olunacaq.
Rusiya nümayəndə heyətinin Conson adına Kosmik Mərkəzə və "Boeing" şirkətinin istehsalat bölməsinə ziyarəti də nəzərdə tutulub.
Kosmik proqram ABŞ və Rusiya arasında hələ də sıx əməkdaşlığın davam etdiyi azsaylı beynəlxalq layihələrdən biridir. "Reuters" qeyd edir ki, digər sahələrdə iki ölkə arasındakı münasibətlər 2022-ci ilin fevralında Rusiyanın Ukraynaya genişmiqyaslı hərbi müdaxiləsindən sonra demək olar ki, tamamilə dayandırılıb.
2025-ci ilin yanvarında ABŞ prezidenti postuna qayıtdıqdan sonra Donald Tramp administrasiyası Moskva ilə təmasları bərpa etmək yönündə addımlar atmağa başlayıb. Lakin sonradan Tramp Ukraynada atəşkəsin əldə olunması üçün real irəliləyiş olmadığına görə Rusiya və prezident Vladimir Putinə qarşı səbrinin tükəndiyini, məyusluq hiss etdiyini açıqlayıb.
Tramp Qəzzada ərzaq mərkəzlərinin qurulacağını elan edib
Şotlandiyada səfərdə olan ABŞ prezidenti Donald Tramp iyulun 28-də Qəzzada çox sayda insanın aclıqdan əziyyət çəkdiyini deyib. O, İsrailin Qəzzaya humanitar yardım məsələsində daha çox iş görə biləcəyini vurğulayıb.
Qəzza səhiyyə orqanları bölgədə iki ildir davam edən müharibə nəticəsində ölü sayının 60 minə yaxınlaşdığını, aclıq və qida çatışmazlığından ölənlərin sayının sürətlə artdığını bildirir. Aclıqdan əziyyət çəkən uşaqların görüntüləri dünyanı sarsıdır və ağırlaşan humanitar vəziyyət fonunda İsrailə qarşı beynəlxalq tənqidləri daha da gücləndirir.
ABŞ prezidenti Şotlandiyada jurnalistlərə açıqlamasında İsrailin Qəzzaya beynəlxalq humanitar yardımın çatdırılmasına görə "böyük məsuliyyət daşıdığını" bildirib.
Qəzzada "real aclıq" olduğunu deyən prezident Trampın bu açıqlaması "Qəzzada aclıq yoxdur" deyən və HƏMAS-a qarşı mübarizəyə davam edəcəyinə söz verən İsrailin baş naziri Benyamin Netanyahunun çıxışı ilə ziddiyyət təşkil edib.
Prezident Trampdan baş nazir Netanyahunun qiymətləndirməsi (Qəzzada aclığın olmaması barədə) ilə razı olub-olmadığı soruşulduqda, Tramp belə cavab verib: "Bilmirəm. Televiziyaya baxanda deyərdim ki, o qədər də yox, çünki o uşaqlar çox ac görünür. Biz bir çox insanı, o uşaqlardan bəzilərini xilas edə bilərik. Bu, həqiqi aclıqdır; mən bunu görürəm və bunu saxtalaşdırmaq mümkün deyil".
"Orada hasar və sərhəd olmadan ərzaq mərkəzləri quracağıq ki, yardım daha asan çatdırılsın", - Tramp əlavə edib. Onun sözlərinə görə, ABŞ digər ölkələrlə birlikdə Qəzza əhalisinə daha çox humanitar yardım, o cümlədən ərzaq və sanitariya vasitələri təmin etmək üçün əməkdaşlıq edəcək.
Ağ evin sözçüsü isə qeyd edib ki, ərzaq mərkəzləri ilə bağlı əlavə detallar yaxın vaxtlarda açıqlanacaq.
İyulun 28-də Netanyahu Qəzzada vəziyyəti "çətin" adlandıraraq ölkəsinin Qəzza zolağına yardımın çatdırılmasını təmin etmək üçün çalışdığını deyib.
"İsrail Qəzza zolağına böyük həcmdə humanitar yardımın çatdırılmasını təmin etmək üçün beynəlxalq qurumlarla, eləcə də ABŞ və Avropa dövlətləri ilə işləməyə davam edəcək", - baş nazirin ofisindən verilən açıqlamada bildirilib.
İyulun 28-də Qəzzadakı Səhiyyə Nazirliyi son 24 saat ərzində azı 14 nəfərin aclıq və qida çatışmazlığından öldüyünü bildirib. Bununla da müharibə zamanı aclıqdan ölənlərin ümumi sayı 147-yə çatıb. Onlardan 88-i uşaqdır və əksəriyyəti son həftələrdə həyatını itirib.
İsrail isə həftəsonu bir sıra humanitar tədbirlər elan edib. Bunlara Qəzzanın üç bölgəsində döyüşlərə gündəlik fasilələr, yardım karvanları üçün yeni təhlükəsiz dəhlizlər və havadan humanitar yardım atışları daxildir.
Britaniya baş naziri Qəzza ilə bağlı fövqəladə iclas keçirir
"Guardian" qəzeti hökumət mənbələrinə istinadən yazıb ki, Britaniya baş naziri Kir Starmer iyulun 28-də Tramp ilə Qəzza mövzusunu qapalı şəkildə müzakirə edib.
Baş nazir bu gün, iyulun 29-da Qəzza üçün sülh planını və humanitar yardım səylərini müzakirə etmək məqsədilə Nazirlər Kabinetinin fövqəladə iclasını keçirəcək. Kir Starmer iyulun 28-də Şotlandiyada Trampla görüşü zamanı Qəzza üçün Avropanın hazırladığı sülh planını da təqdim edib.
Baş nazirin ofisi planın detalları barədə açıqlama verməsə də, bugünkü kabinet iclasından sonra "növbəti addımlar"ın ictimaiyyətə açıqlanacağını bildirib.
Starmerin sözçüsünün verdiyi məlumata görə, bu təkliflər qarşıdakı günlərdə ərəb dövlətləri də daxil olmaqla müttəfiq ölkələrə təqdim olunacaq.
Qəzzada döyüşlər 2023-cü ilin oktyabrında HƏMAS-ın İsrailin cənubuna hücum edərək 250-dən çox insanı girov götürdüyü vaxtdan bəri davam edir. İsrailin Qəzza zolağında davam edən hərbi əməliyyatı isə on minlərlə sakinin ölümünə səbəb olub. Vaxt keçdikcə bir çox Qərb ölkələri bu əməliyyata görə İsraili daha çox tənqid etməyə başlayıb. Beynəlxalq Cinayət Məhkəməsi hətta HƏMAS-ın bir neçə komandiri ilə yanaşı, İsrailin baş naziri Benyamin Netanyahunun həbsi barədə order verib.
Rusiya Zaporojyedə cəzaçəkmə müəssisəsini vurub, 16 nəfər ölüb
Rusiya qoşunları iyulun 29-na keçən gecə Zaporojye vilayətindəki cəzaçəkmə müəssisəsinə zərbə endirib, 16 nəfər ölüb, 35 nəfər yaralanıb. Bu barədə vilayət hərbi administrasiyasının rəhbəri İvan Fyodorov məlumat verib.
İlkin məlumata görə, zərbələr idarəolunan aviabombalarla həyata keçirilib.
“Yaralılara bütün zəruri tibbi yardım göstərilir. Müəssisənin binaları dağılıb. Yaxınlıqdakı fərdi evlərə də ziyan dəyib”, – deyə o bildirib.
Ukrayna Prezident Administrasiyasının rəhbəri Andrey Yermak isə qeyd edib ki, “bu, rusların növbəti hərbi cinayətidir və onlar yalnız qarşısı alınarsa dayanarlar”.
Rusiya hərbçiləri həmçinin Dnepropetrovsk vilayətinin Sinelnikov rayonu ərazisindəki kəndlərdən birinə pilotsuz uçuş aparatları ilə hücum ediblər. Ukraynanın Fövqəladə Hallar üzrə Dövlət Xidmətinin məlumatına görə, yanğının söndürülməsi zamanı xilasedicilərə təkrar zərbə endirilib, yanğınsöndürmə maşını zədələnib.
Vilayət hərbi administrasiyasının rəhbəri Sergey Lısak qeyd edib ki, Sinelnikov rayonunda bir neçə yaşayış məntəqəsi zərbələrə məruz qalıb. Hücum nəticəsində 2 nəfər həlak olub, 3 nəfər yaralanıb. Beş fərdi ev, inzibati bina, mağazalar, yanacaqdoldurma məntəqəsi və avtomobillər ziyan görüb.
Kamyanske şəhərinə raket hücumu nəticəsində üçmərtəbəli bina, doğum evi və şəhər xəstəxanasının bir şöbəsi zədələnib. Hadisə nəticəsində 2 nəfər ölüb, 5 nəfər yaralanıb. “İki qadının vəziyyəti ağırdır. Onlardan biri hamilədir”, – deyə Sergey Lısak əlavə edib.
Sankt-Peterburqda miqrantlar taksi sürə bilməyəcəklər
Sankt-Peterburqun qubernatoru Aleksandr Beqlov miqrantlara şəhərdə taksi sürməyi və "icarəyə götürülmüş minik avtomobillərində" işləməyi qadağan edib.
Beqlov qərarı iyulun 28-də imzalayıb, 2025-ci ilin sonuna qədər qüvvədədir. Bu barədə "Fontanka" nəşri qubernatorun mətbuat xidmətinə istinadən yazır.
Sənəd imzalandıqdan 10 gün sonra qüvvəyə minəcək. İşəgötürənlərə miqrant sürücülərlə bağlanmış müqavilələri ləğv etmək üçün üç ay vaxt verilir.
Hakimiyyət bu tədbirlə "xidmətlərin keyfiyyətini və təhlükəsizliyini" artırmağı planlaşdırır.
Bu cür qadağanın tətbiqi 2025-ci ilin mayında müzakirə olunmuşdu. "Nastoyaşeye Vremya" layihəsinin efirində iqtisadçı bu təşəbbüsü şərh edərək bildirmişdi ki, bu cür tədbirlər taksi və çatdırılma xidmətlərini bahalaşdıracaq, ümumilikdə iqtisadiyyatın vəziyyətinə təsir göstərəcək.
Tramp Rusiyaya 10-12 günlük möhlət verdiyini deyir [Video]
ABŞ prezidenti Donald Tramp deyir ki, bu gündən, yəni iyulun 28-dən başlayaraq Rusiya prezidenti Vladimir Putinə Ukraynada atəşkəsə razılaşmaq üçün 10-12 günlük möhlət verir.
Şotlandiyanın Turnberri şəhərində jurnalistlərlə danışan D.Tramp bildirib ki, o, Putinlə bağlı "çox məyusdur", əgər Moskva Kiyevlə sülh sazişinə nail olmursa, bu ayın əvvəlində tərəflərə verdiyi 50 günlük ilkin müddətin sonunu gözləməsinə "ehtiyac yoxdur".
“Mən bu gündən etibarən təxminən 10-12 günlük yeni bir müddət müəyyənləşdirəcəyəm”, – Tramp Britaniyanın baş naziri Keir Starmerlə görüşü zamanı jurnalistlərə deyib.
“Kiminləsə uzun müddət işləyəndə, onun nə edəcəyini, yaxud etməyəcəyini artıq bilirsən. Mən ona [Putinə] bir şans verdim. O, bundan istifadə etmir”, – o əlavə edib.
Daha əvvəl Tramp Putinə Ukrayna ilə müharibəni dayandırmaq və sülh sazişi bağlamaq üçün 50 gün vaxt vermişdi. O, bu barədə bəyanatını düz iki həftə əvvəl - bazar ertəsi, iyulun 14-də səsləndirib. Əgər danışıqlarda irəliləyiş əldə olunmasa, ABŞ Rusiya mallarının alıcılarına 100 faizlik idxal rüsumları tətbiq edəcəyini bildirib.
Nüfuzlu respublikaçı senator Lindsi Qrem deyib ki, ikinci dərəcəli sanksiyalar Rusiya neftinin 80%-ni alan Çin, Hindistan və Braziliyanı hədəf alacaq.
"Putin sanksiyalar altında yaşaya bilər, lakin Çin, Hindistan və Braziliya Amerika bazarı ilə Putinə kömək arasında seçim etməli olacaq. Düşünürəm ki, onlar ABŞ tərəfini seçəcəklər", - senator vurğulayıb.
ABŞ dövlət katibi deyir ki, Trampın 'səbri tükənir'
Rusiyanın Ukrayna ilə münaqişədəki davranışı ABŞ Prezidenti Donald Trampın "səbrini tükədir", Moskvanın müharibəyə son qoya biləcək hər hansı bir addım atmasını gözləməyə "həvəsi də azalır". Bunu ABŞ dövlət katibi Marko Rubio “Fox News”a müsahibəsində bildirib.
Tramp özü də bir neçə dəfə bu fikri dilə gətirib. Dövlət katibi isə deyib ki, ABŞ prezidentinin rusiyalı həmkarı Vladimir Putinlə telefon danışıqları müsbət atmosferdə keçsə də, "heç bir nəticə vermir". Dövlət katibinin sözlərinə görə, Rusiya sadəcə vaxt udur.
"O (Tramp) özünün bu tələyə salınmasına imkan verməyəcək. O, danışıqlar haqqında sonsuz danışıqlar aparmaq niyyətində deyil", – Rubio vurğulayıb və əlavə edib ki, Tramp müharibənin başlanmasına məsul olmasa da, onu bitirmək istəyir.
İyulun 14-də Tramp, Rusiyanı və şəxsən Putini sülh istəmədiklərinə görə sərt tənqid edib. O bildirib ki, Ukraynada sülh sazişi bağlanması üçün 50 gün vaxt verir. Bu müddət sentyabrın 3-də başa çatır. Trampın sözlərinə görə, bu tarixdən sonra o, Rusiyanın özünə və ondan enerjidaşıyıcıları alan ölkələrə sanksiyalar, ilk növbədə yüksək gömrük rüsumları şəklində tətbiq etməyə hazırdır.
Rubio “Fox News”a müsahibəsində deyib ki, xüsusən də Rusiyadan neft alan Çin olmadan, Putin “bu müharibəyə tab gətirə bilməzdi”.
Tramp həmçinin ABŞ-ın müttəfiqlərinə Ukrayna üçün silah satmağa hazır olduğunu bəyan edib. Almaniya da daxil bir sıra ölkələr bu sxemdə iştiraka hazır olduqlarını bildiriblər.
Rusiya Trampın bəyanatlarına təmkinli reaksiya verib. Bu açıqlamalardan sonra Moskvanın rəsmi mövqeyində heç bir dəyişiklik olmayıb. Rusiya təmsilçiləri bildirirlər ki, onlar sülhdə maraqlıdırlar, lakin müəyyən şərtlərlə. Kiyev isə bu şərtləri təslimçilik kimi qəbul edir. Söhbət, xüsusilə, Ukraynanın bəzi ərazilərindən imtina etməsindən gedir.
Neytral statusa malik Avstriya NATO-ya üzvlüyü düşünür
"Bir şey aydındır: neytrallıq özlüyündə bizi qorumur"
Avstriyanın xarici işlər naziri Beate Maynl-Rayzinqer Almaniyanın "Die Welt" nəşrinə müsahibəsində Rusiyanın aqressivləşən siyasəti fonunda ölkəsinin NATO-ya mümkün qəbulu ilə bağlı müzakirələri "faydalı" adlandırıb.
Eyni zamanda nazir etiraf edib ki, avstriyalıların əksəriyyəti hazırda Avstriyanın Şimali Atlantika Alyansına qoşulmasının əleyhinədir.
"Bir şey aydındır: neytrallıq özlüyündə bizi qorumur. Getdikcə daha qeyri-sabit beynəlxalq vəziyyət və daha da aqressivləşən Rusiya şəraitində Avstriyanı gerçəkdən qoruyan ölkənin müdafiə qabiliyyətinə və tərəfdaşlıqlara yatırılan investisiyalardır. Mən ümumilikdə təhlükəsizlik və müdafiə sahəsində Avstriyanın gələcəyi ilə bağlı ictimai müzakirənin başlanmasına açığam. Hazırda parlamentdə və əhali arasında NATO-ya üzvlüyə dəstək çoxluğu olmasa da, belə bir müzakirə çox faydalı ola bilər", - deyə nazir bildirib.
"Biz kresloda arxaya söykənib oturaraq deyə bilmərik: biz heç kimə toxunmuruqsa, heç kim də bizə toxunamayacaq, narahat etməyəcək. Bu, sadəlövhlük olardı... Biz Avropanın ümumi təhlükəsizlik və müdafiə siyasətini dəstəkləmək üçün mümkün olan hər şeyi edirik - maliyyə, hərbi və siyasi. 1995-ci ildə Avropa İttifaqına daxil olduqdan sonra Avstriyanın neytrallığı əhəmiyyətli dərəcədə dəyişib", - Avstriya XİN rəhbəri əlavə edib.
Avstriya 1955-ci ildə müttəfiq qoşunlarının çıxarılmasından sonra öz neytrallığını elan edib. Dövlətin neytral statusu ölkə konstitusiyasında təsbit olunub. Eyni zamanda, Avstriya Sülh Naminə Tərəfdaşlıq proqramı çərçivəsində NATO ilə əməkdaşlıq edir.
Tramp Aİ ilə ticarət razılaşmasının əldə olunduğunu bildirib
ABŞ prezidenti Donald Tramp Şotlandiyada Avropa Komissiyasının prezidenti Ursula Fon der Lyayenlə danışıqlardan sonra ABŞ və Avropa İttifaqı arasında ticarət razılaşmasının əldə olunduğunu bildirib.
Trampın sözlərinə görə, ABŞ-yə Avropa İttifaqından (Aİ) idxal olunan mallara tətbiq olunacaq rüsumlar onun əvvəlcə bəyan etdiyi kimi 30% deyil, 15% olacaq. ABŞ prezidenti əldə olunan razılaşmanı "özünəməxsus bir tərəfdaşlıq" adlandırıb.
ABŞ prezidentinin sözlərinə görə, bu "özünəməxsus tərəfdaşlıq" çərçivəsində Avropa İttifaqı ABŞ-dən 750 milyard dollar dəyərində enerji resursları almağa, ABŞ iqtisadiyyatına daha 600 milyard dollar investisiya qoymağa, həmçinin ABŞ-dən "külli miqdarda" silah almağa razılıq verib.
Trampın ticarət sazişləri üçün verdiyi müddət avqustun 1-də başa çatır, bundan sonra Vaşinqtonla razılığa gələ bilməyən ölkələr və ya birliklərə qarşı yüksək ticarət rüsumları tətbiq olunacaq.
Avropa Komissiyasının prezidenti Ursula Fon der Lyayen Trampla görüş üçün onun Şotlandiyanın cənub-qərbindəki Törnberri qolf klubuna gəlib. Görüşdən əvvəl onlar jurnalistlərə razılığa gəlməyə ümid etdiklərini bildiriblər. Eyni zamanda, Tramp daha əvvəl belə razılaşma ehtimalını "50-yə 50" qiymətləndirmişdi. Ursula Fon der Lyayen də görüşün əvvəlində eyni qiymətləndirməni verərək bildirib ki, razılaşma əldə olunacağı halda bu, ABŞ və Aİ arasında indiyədək bağlanmış "ən mühüm saziş" olacaq.
Dünya üzrə mal və xidmətlər ticarətinin təxminən üçdə biri ABŞ və Avropa İttifaqının payına düşür. Aİ-nin ABŞ-yə ixracı ABŞ-dən Avropaya ixracdan xeyli çoxdur (ötən ilin statistikasına görə, 370 milyard dollar ixraca qarşı 606 milyard dollar idxal) və Tramp bu ticarət balanssızlığını ciddi problem hesab edir. O, əgər razılaşma əldə olunmasa, avqustun 1-dən Avropa mallarına 30%-lik tarif tətbiq edəcəyi ilə hədələyirdi.
Aİ əvvəlcə ABŞ-nin rüsumlarına cavab tədbirləri hazırlamışdı. Bu tədbirlər Tramp administrasiyasının apreldə əksər ölkələrə qarşı yüksək rüsum qərarını donduraraq onlarla danışıqlara başlamaq qərarından sonra dayandırıldı. ABŞ indiyədək yalnız bir neçə ölkə ilə ticarət razılaşması əldə edə bilib.
Çoxdan görünməyən Putin Sankt-Peterburqa gedib
2017-ci ildən bəri Neva çayında keçirilən Böyük Hərbi-Dəniz Paradı ilk dəfə bu il "ümumi vəziyyət və təhlükəsizlik səbəbi"ndən ləğv olunub. Amma Rusiya prezidenti Vladimir Putin iyulun 27-də Sankt-Peterburqa gedib.
Leninqrad vilayəti bazar günü səhər saatlarında Ukrayna dronlarının hücumuna məruz qalıb. Paradın ləğv ediləcəyi isə daha əvvəldən elan olunmuşdu.
"Agentstvo" yazır ki, Putin Saray meydanında kortejini dayandıraraq ictimaiyyətlə görüşüb.
Putin nadir hallarda küçədə ictimaiyyətin qarşısına çıxır, lakin son illərdə o, bunu hakimiyyətinə təhdid kimi qiymətləndirilən hadisələrdən sonra edib. Məsələn, 2023-cü ilin iyununda Yevgeni Priqojinin qiyamından və müxalifət lideri Aleksey Navalninin dəfnindən sonra. "Agentstvo"nun yazdığına görə, bu dəfə Putin Rusiyanın mərkəzini hədəf alan dron hücumlarının artması fonunda ictimaiyyətin qarşısına çıxıb. Həmin hücumlar ciddi dağıntılara və ya tələfata səbəb olmasa da, təyyarə və qatarların hərəkət cədvəlində pozuntular yaranır. Xüsusilə, iyulun 27-dəki dron hücumları Sankt-Peterburqdakı Pulkovo hava limanında 100-dən çox reysin gecikməsinə səbəb olub.
Kremlin mətbuat xidməti və TASS dövlət agentliyinin yayımladığı kadrlarda görünür ki, Putin meydanda Sovet İttifaqının Hərbi-Dəniz Donanması bayrağını tutmuş dənizçi formasında olan bir kişi ilə söhbət edib. Həmin şəxs prezidentdən "faşistlərlə mübarizə aparmağı" xahiş edib və artıq "sakitcə ölə biləcəyini" deyib. Digər kadrlarda isə görüş iştirakçıları Putinə təriflər deyir və onun soyadını ucadan səsləndirirlər.
Putin Dvorçovaya meydanında ictimaiyyətlə görüşməklə yanaşı, paraddakı kimi Neva çayı boyunca katerlə də hərəkət edib və Hərbi Dəniz Qüvvələri Günü münasibətilə dənizçiləri təbrik etdiyi Admiralteystvoya baş çəkib. O, həmçinin Şimal, Sakit okean, Baltik, Qara dəniz donanmalarının və Xəzər flotillasının əməliyyat zonalarında keçirilən "İyul fırtınası" adlı operativ təlimin gedişatını yoxlayıb. Bundan əlavə, Putin Baltik donanmasının gəmilərinin də yerləşdiyi Kronştadta səfər edib, orada "Admiral Qriqoroviç" freqatının göyərtəsinə qalxıb. Dəniz Kollegiyasının sədri və prezidentin köməkçisi Nikolay Patruşev Putinə "Rusiya donanmasına sədaqətə görə" adlı medalı təqdim edib.
2017- 2024-cü illərdə Hərbi Dəniz Donanması Günü münasibətilə Sankt-Peterburqda hərbi-dəniz paradı keçirilirdi. Bu parad Baltik donanmasının hərbi gəmilərinə baxışı əhatə etsə də, iştirak üçün digər donanmalara məxsus, eləcə də xarici ölkələrin hərbi gəmiləri də gəlirdi.
Paradlar Ukraynaya qarşı genişmiqyaslı müharibənin ilk üç ili ərzində də davam edib. Lakin 2024-cü ildə parad əvvəlki illərlə müqayisədə daha qısa olub.
Rusiya işğal müharibəsinə başladıqdan sonra Ukrayna ordusu Qara dənizdə 10-dan çox Rusiya hərbi gəmisini batırmağa və ya sıradan çıxarmağa müvəffəq olub. Onların arasında donanmanın flaqman gəmisi olan "Moskva" kreyseri də var. Ukraynanın hücumları ilə əlaqədar Rusiya gəmilərinin əksəriyyətini işğal olunmuş Krımdan Novorossiyskə köçürüb.
Kadırov Türkiyədə xəstəxanaya yerləşdirilib
Çeçenistanın rəhbəri Ramzan Kadırov Bodrumdakı beşulduzlu oteldə istirahət zamanı xəstəxanaya yerləşdirilib. Bu barədə Türkiyə mediası məlumat yayıb.
Hadisə iyulun 24-də günorta saatlarında baş verib. "Haberler" xəbər portalının məlumatına görə, Kadırov dənizdə olarkən qəfil boğulmağa başlayıb. Onu sahil mühafizə xidmətinin əməkdaşları xilas edib və dərhal təcili tibbi yardım çağırıblar. Həkimlər ilkin tibbi yardım göstərdikdən sonra Kadırov təcili yardım maşını ilə xəstəxanaya aparılıb.
"Milliyet" onun özəl xəstəxanaya aparıldığını, səhhətinin artıq yaxşılaşdığını və heç bir həyati təhlükəsinin olmadığını bildirib.
2024-cü ilin aprelində "Novaya qazeta. Avropa" R.Kadırovun ağır xəstəliyi və onun mümkün varisi barədə yazıb. Nəşrin məlumatına görə, Kadırova "pankreonekroz" – "mədəaltı vəzinin nekrozu" diaqnozu qoyulub. Diaqnozun ona hələ 2019-cu ildə qoyulduğu qeyd olunub. O, tez-tez məzuniyyətə çıxır, ictimaiyyət qarşısında görünmür və sonradan özünün sağlam olduğunu sübut etmək üçün videolar paylaşır.
Bakı Özbəkistan prezidentini alçaltmaqda ittiham olunan şəxsi Daşkəndə verib
Azərbaycan Özbəkistan prezidentini təhqir etməkdə ittiham olunan şəxsi Daşkəndə ekstradisiya edib.
Bu barədə bu gün, iyulun 25-də Azərbaycan Baş Prokurorluğu məlumat yayıb.
Məlumatda vurğulanır ki, Özbəkistanda prezidentin şərəf və ləyaqətini alçaltmaqda təqsirləndirilərək dövlətlərarası axtarışa verilmiş 1982-ci il təvəllüdlü Amonbek Yusupov bu ilin aprelində Azərbaycanda saxlanıb, barəsində həbs-qətimkan tədbiri seçilib: ""Mülki, ailə və cinayət işləri üzrə hüquqi yardım və hüquqi münasibətlər haqqında" 07.10.2002-ci il tarixli Konvensiyaya əsasən, təqsirləndirilən şəxsin ekstradisiyası haqqında qərar qəbul edilərək Ədliyyə Nazirliyinin Penitensiar Xidmətinin xüsusi konvoyunun müşayiəti ilə Özbəkistan Respublikasının səlahiyyətli orqanına təhvil verilib".
Bu qərara və ittihama A.Yusupovdan, onun yaxınlarından münasibət almaq mümkün olmayıb.
Özbəkistanda prezidentə təhqir və ya böhtan atmaq ittihamına görə məsuliyyəti müəyyən edən bənd ölkənin Cinayət Məcəlləsinə 2021-ci ilin martında salınıb. Bu maddə 3 ilədək islah işləri, azadlığın məhdudlaşdırılması və ya 5 ilədək azadlıqdan məhrumetmə cəzasını nəzərdə tutur.
Xatırlatma
Ötən il Azərbaycanla Özbəkistan arasında müttəfiqlik münasibətləri haqqında müqavilə imzalanıb. Yerli və beynəlxalq insan hüquqları təşkilatlarının hesabatlarında həm Özbəkistanda, həm də Azərbaycanda siyasi məhbuslardan da bəhs edilir. ABŞ Beynəlxalq Dini Azadlıq Komissiyasının hesabatına görə, Özbəkistanda 2 min dini və siyasi məhbus var. Azərbaycanda isə siyasi məhbusların sayı 270 civarında göstərilir. Amma hər iki ölkədə rəsmilər siyasi məhbusların olması ilə bağlı deyilənləri qəbul etmirlər. Onlar deyirlər ki, ölkələrində siyasi məhbus sayılan şəxslər sırf törətdikləri əmələ görə məsuliyyətə alınıblar.
Əliyev Putinə başsağlığı verib
Azərbaycan prezidenti İlham Əliyev Rusiya dövlət başçısı Vladimir Putinə Amur vilayətində baş vermiş təyyarə qəzası ilə bağlı başsağlığı verib.
Rusiyada itən təyyarənin qəzaya uğradığı məlum olub
Rusiyanın Amur vilayətində "An-24" sərnişin təyyarəsi qəzaya uğrayıb. Təyyarənin göyərtəsində 43 sərnişin və altı ekipaj üzvü olmaqla ümumilikdə 49 nəfər olub.
"İlkin məlumatlara görə, hamı ölüb. Hələlik xilasediciləri daşıyan vertolyot qəza olan əraziyə enə bilmir çünki bu, çətin relyefi olan ərazidir, dağ yamacıdır. Hadisə yerində yanğın var", - mənbə TASS-a bildirib.
TASS həmçinin fövqəladə hallar xidmətinə istinadən yazır ki, qəzanın səbəbi, çox güman, zəif görmə şəraitində eniş zamanı ekipajın səhvi olub.
+++
Rusiya İstintaq Komitəsi rəsmi olaraq bəyan edib ki, bu gün səhər saatlarında Amur vilayətində baş vermiş "An-24" təyyarə qəzasında heç kim sağ qalmayıb. Vilayətdə üçgünlük matəm elan olunub.
Qəzaya uğrayan təyyarə təxminən 50 il əvvəl istehsal olunub və onun uçuşa yararlılıq sertifikatı 2036-cı ilə qədər uzadılıbmış. "The Insider" nəşri yanvar ayında "Reuters"in dərc etdiyi xəbəri xatırladıb: həmin məlumatda "Anqara" şirkətinin baş direktoru yeni texnikanın olmaması səbəbiylə 50 illik "An-24" və "An-26" təyyarələrinin istismarının uzadılmasına icazə verilməsini xahiş etmişdi.
Rusiyada göyərtəsində 43 nəfərin olduğu təyyarə ilə əlaqə itib
Rusiyanın Amur vilayətində "An-24" sərnişin təyyarəsi yoxa çıxıb. Bu barədə "İnterfaks" məlumat yayıb. Məlumatı Rusiya Fövqəladə Hallar Nazirliyi və vilayətin qubernatoru Vasili Orlov təsdiqləyib.
"An-24" təyyarəsi Xabarovsk-Blaqoveşensk-Tında marşrutu ilə uçurdu... Onunla əlaqə kəsilib", - fövqəladə hallar xidməti bildirib.
RBC xəbər verir ki, sözügedən təyyarə "Anqara" aviaşirkətinin məxsus olub. "Baza" Teleqram kanalı isə yazır ki, "An-24" eniş etməyə hazırlaşırmış, lakin ilk cəhddə bunu edə bilməyib, ona görə də təyyarə ikinci dəfə eniş üçün uzaqlaşıb, bundan sonra onunla əlaqə kəsilib.
Qubernator bildirib ki, ilkin məlumata görə, təyyarədə 43 sərnişin, həmçinin altı ekipaj üzvü olub.
"An-24"ün axtarışına "Mi-8" helikopteri və 12 nəfərlik qrup göndərilib.
55 milyon ziyan vurulub, onun 21 milyon manatı ödənilib
Prokurorluq orqanlarında ibtidai istintaqı yekunlaşmış cinayət işləri və tamamlanmış araşdırma materialları üzrə ümumilikdə 55 milyon 783 min manat maddi ziyan vurulduğu müəyyən edilib.
Bu, bu gün, iyulun 24-də Azərbaycan Baş Prokurorluğunda bu ilin birinci yarısında görülmüş işlərin yekunları və qarşıda duran vəzifələrə dair kollegiya iclasında bildirilib.
Habelə vurğulanıb ki, istintaq tədbirləri ilə onun 37.7 faizinin - 21 milyon 26 min manat hissəsinin ödənilməsinə nail olunub: "Habelə 13 milyon 788 min manat məbləğində əmlak üzərinə həbs qoyulub".
Baş Prokurorluğun məlumatına görə, ötən il isə ibtidai istintaqı yekunlaşmış cinayət işləri üzrə ümumilikdə 170 milyon 958 min manat maddi ziyan vurulduğu müəyyən edilib: "İstintaq tədbirləri ilə onun 44 faizinin, yəni 75 milyon 300 min manat hissəsinin ödənilməsinə nail olunmuş, habelə 33 milyon manatdan artıq məbləğdə əmlak üzərinə həbs qoyulub".
Xatırlatma
Azərbaycanda bir sıra müstəqil ekspertlər korrupsiya ilə mübarizəni yetərli saymırlar. Üstəlik, onların fikrincə, aşağı səviyyədə qanunsuzluqlara yol verən bir çox məmurlar məsuliyyətə cəlb edilsə də, onlar heç də həmişə cəzalarını axıra qədər çəkmir, müxtəlif yollarla vaxtından əvvəl azadlıqlarına qovuşurlar.
