Azərbaycan xəbərləri
İlahiyyatçının məhkəməsi qalmaqalla başladı
“Azərbaycan əhalisinin 90 faizindən çoxu müsəlmandır və cümə namazı xalqın dəyəridir. Bu dəyərin qanunla məhdudlaşdırılması bir növ islam dininə basqıdır”.
Mayın 19-u Masallı Rayon Məhkəməsindəki çıxışında dini ayinlər adı altında insanların hüquqlarına qəsd etməkdə ittiham olunan ilahiyyatçı Sərdar Babayev belə deyib.
İlahiyyatçı ona verilən ittihamın mahiyyətini başa düşməyə çalışdığını, amma anlamağa çətinlik çəkdiyini ifadə edib.
Buna da bax: Xaricdə dini təhsil alanlara məhdudiyyət götürüldü
“Bu yersiz ittihamın mahiyyəti mənə aydın deyil. Əgər qanunlarda Avropa standartlarına istinad edirlərsə, hər həftənin cümə günü dünyanın inkişaf etmiş bütün ölkələrində, Avropada, Amerikada, hətta müsəlman əhalisi az olan ölkələrdə belə cümə günü “cümə namazı” qılınır. Həmin namazların çoxunu da məhz mənim təhsil aldığım beynəlxalq universitetin məzunları icra edir”, ilahiyyatçı məhkəmə heyətinə xitabən bildirib.
Yenə cinayət işi açacaqsınız?...
Sərdar Babayev həmçinin deyib ki, söhbət xaricdə təhsil almadan gedirsə o, təhsilini 2000-ci ildə bitirib və geri qayıdıb. Məhdudlaşdırıcı qanun isə 2015-ci ildə qəbul olunub.
“Qanunun geri tətbiqi olmadığı üçün mənə də aidiyyəti yoxdur”, deyən ilahiyyatçı hakimə sual edib ki, “əgər sabah anam dünyasını dəyişsə və anam üçün meyit namazı qılmaq istəsəm onda mənə yenə cinayət işi açacaqsınız?”..
Buna da bax: Şeyxin səlahiyyətləri artırılır
Vəkil Cavad Cavadov isə məhkəməyə bir neçə vəsatət təqdim edib.
Vəsatətlər məhkəmənin audio və videosunun lentə alınması, vəkillərin S.Babayevlə yanaşı əyləşməsinə imkan yaradılması ilə bağlı olub. Dövlət ittihamçısı bu vəsatətə etiraz etməyib, ancaq məhkəməyə sədrlik edən hakim Anar Alməmmədov qərar verilməsini növbəti iclasa saxlayıb.
Digər vəsatətlər Sərdar Babayevin həbsinin ev dustaqlığı ilə əvəz olunması, işin ibtidai istintaq baxışından ötrü yenidən prokurorluğa göndərilməsi ilə bağlı olub. Həmin vəsatətlərə dövlət ittihamçısı etiraz edib. Öz növbəsində məhkəmə də vəsatətləri rədd edib.
Həbs qətimkan tədbirinin tamamilə ləğv edilməsi ilə bağlı vəsatət də qəbul olunmayıb.
Növbəti məhkəmə iclası mayın 25-də keçiriləcək.
Buna da bax: İlahiyyatçı Sərdar Babayev həbsdə qalıb
Məhkəmə önündə
Məhkəmə prosesi keçirilərkən binanın qarşısında qarışıqlıq yaranıb. Prosesi izləməkdən ötrü müxtəlif rayonlardan gələn, eləcə də yerli yüzdən artıq inanclı insanın məhkəmə qarşısına toplaşmasına imkan verilməyib.
Əraziyə cəlb edilən polis qüvvələri onları dağıdıblar. Yaranan qarışıqlıq zamanı 6 nəfərin saxlanaraq polisə aparıldığı bildirilir.
Ancaq onların sonrakı taleyinə, hələlik, polisdən aydınlıq gətirmək mümkün olmayıb.
Prosesi işıqlandırmaq istəyən media təmsilçilərinin də basqıya məruz qaldığı söylənir.
Dini məzmunlu “İslamın Səsi" xəbər saytının baş redaktoru Xəyal Şükür saxlanıb. Jurnalistin əlindən alınan peşə alətləri materiallar silindikdən sonra geri verilib və jurnalist sərbəst buraxılıb.
Buna da bax: İlahiyyatçının müdafiə konfransı keçirilib
XATIRLATMA
Bu il fevralın 22-si Masallı Rayon Məhkəməsi S.Babayev barəsində 1 ay 7 gün müddətinə həbs-qətimkan tədbiri seçib. Sonradan həbs müddəti artırılıb.
Ona CM-in 168.1-ci (dini ayinlər adı altında insanların hüquqlarına qəsd etmək) maddəsi ilə ittiham verilib.
Olaya münasibət bildirən yerli rəsmilər bildiriblər ki, S.Babayev ölkədən xaricdə dini təhsil alıb. Azərbaycanın mövcud qanunları isə onun dini mərasim idarə etməsinə imkan vermir.
Müdafiə tərəfi isə bildirir ki, S. Babayev qanunvericiliyə həmin məhdudlaşdırıcı maddə əlavə edilməzdən öncə xaricdə dini təhsil alıb.
Buna da bax: 'Masallıda həbs edilən dindar xütbələrində haqsızlıqlardan danışırmış'
Habelə, Qafqaz Müsəlmanları İdarəsində vəzifə tutan bir çox şəxslər də xaricidə dini təhsil alıb. Üstəlik, həmin məhdudlaşdırıcı maddə bu il mayında yumşaldılıb. Artıq, xaricidə dini təhsil alanlar da Qafqaz Müsəlmanlar İdarəsinin razılığından sonra ölkədə dini mərasimlər apara bilərlər.
Yerli sakinlərin AzadlıqRadiosu-na bildirməsinə görə, S.Babayev həmişə məsciddə oxuduğu xütbələrdə ölkədəki problemlərdən bəhs edərək, tənqidi fikirlər səsləndirib.
Bütün xəbərləri izləyin
Hesablama Platası 65 milyon manatlıq pozuntu aşkarladığını bildirir
Azərbaycan Hesablama Palatası (HP) dövlət vəsaitlərinin istifadəsində 65 milyon manatlıq pozuntu aşkarladığını bildirir.
Bu barədə Palatanın 2025-ci ilin ilk yarsında fəaliyyətinə aid iyulun 29-da açıqlanan hesabatında qeyd edilir.
Məlumata görə, qurumun həyata keçirdiyi audit tədbirləri nəticəsində dövlət vəsaitlərinin istifadəsində ciddi nöqsanlar və hüquqpozmalara rast gəlinib.
Hesabata görə, ümumilikdə 65 milyon manatlıq pozuntu faktı qeydə alınıb ki, bunun da 17,8 milyon manatı birbaşa dövlət büdcəsinə zərər kimi qiymətləndirilib.
Büdcə vəsaitlərinin bəzi hallarda funksional təyinatından kənar istifadə olunduğu müəyyən edilib. Artıq xərclər əsasən nəqliyyat xidmətləri, hədiyyə alınması və beynəlxalq tədbirlərlə bağlı olub. Habelə qeyd edilir ki, bəzən satınalmalar üzrə qanunvericiliyin tələbləri pozulub -planlaşdırma sənədləri yerləşdirilməyib, müqavilələr vaxtında icra edilməyib.
105,1 milyon manatlıq təhrif
Həmçinin vurğulanır ki, Palata maliyyə hesabatlarında 105,1 milyon manatlıq təhrif müəyyən edib. Bu məbləğin 12,6 milyon manatı əhəmiyyətli təhrif kimi dəyərləndirilib.
Hesabata görə, uyğunsuzluqlar əsasən dövlət vəsaitlərinin uçotu və istifadə olunması zamanı mühasibat, hesabat sistemlərində yol verilmiş nöqsanlar nəticəsində yaranıb.
Qeyd olunur ki, bir sıra qurumlarda dövlət əmlakı, aktivlərinin real dəyəri uçota düzgün alınmayıb, gəlir və xərclər qeyri-dəqiq əks olunub.
Hesablama Palatası nöqsanların aradan qaldırılması və maliyyə nizam-intizamının gücləndirilməsi məqsədilə aidiyyəti qurumlara təkliflər təqdim edib.
Hesabatda pozuntu və uygunsuzluqlara yol verən qurumların adları çəkilməyib.
Azərbaycan Hesablama Platası 2001-ci ildən fəliyyət göstərir. Hər il Milli Məclisə hesabat verməli olan bu qurum dövlət büdcəsinin həm gəlirlərinə, həm də xərclərinə nəzarət etməlidir. Ölkə parlamentindən fərqli olaraq bəzi müxalif qüvvələr onun fəaliyyətini tam yetərli saymır. Onlar hesab edirlər ki, bu qurum büdcə vəsaitlərinin mənimsənilməsinə aid ciddi pozuntuların üzərinə qətiyyətlə gedə bilmir. Hərçənd, Palata rəhbərliyi belə fikirləri qəbul etmir.
UNICEF-in Azərbaycandakı nümayəndəsinin diplomatik fəaliyyəti başa çatır
Birləşmiş Millətlər Təşkilatının (BMT) Uşaq Fondunun (UNICEF) Azərbaycandakı nümayəndəsi Saja Farooq Abdullahın Azərbaycanda diplomatik fəaliyyəti başa çatır.
Xarici İşlər Nazirlyinin (XİN) iyulun 29-da yaydığı məlumata görə, bu münasibətlə nazir Ceyhun Bayramov Saja Farooq Abdullahı qəbul edib.
“Görüşdə Azərbaycan və BMT, o cümlədən UNICEF arasında mövcud əməkdaşlıq məsələləri nəzərdən keçirilib, Azərbaycanda, o cümlədən digər ölkələrdə həyata keçirilən birgə təşəbbüslərdən, layihələrdən bəhs olunub”, - məlumatda əlavə edilib.
Azərbaycanda son dövrlərdə bəzi beynəlxalq təşkilatların fəaliyyəti məhdudlaşdırılıb.
Məsələn, iyunun 17-də Azərbaycanın Əsir və itkin düşmüş, girov götürülmüş vətəndaşlarla əlaqədar Dövlət Komissiyası bildirdi ki, Beynəlxalq Qızıl Xaç Komitəsinin (BQXK) Azərbaycandakı Nümayəndəliyinin yaxın vaxtlarda fəaliyyətini dayandıracağı gözlənir. Amma həmin qurum, hələlik, bu məlumata münasibət bildirməyib.
Üstəlik, yerli saytların məlumatına görə, rəsmi Bakı hələ bu ilin əvvəlində BMT-nin dörd ofisinin - BMT İnkişaf Proqramı (UNDP), BMT Əhali Fondu (UNFPA), BMT-nin Qaçqınlar üzrə Ali Komissarlığı (UNHCR) və BMT Uşaq Fondunun (UNICEF) Azərbaycanda ofislərinin bağlanması təklifi ilə çıxış edib.
Artıq həmin nümayəndəliklərin bir çoxu ya Azərbaycanda fəaliyyətlərini dayandırıblar və yaxud dayandıracaqlarını açıqlayıblar.
Habelə vurğulanırdı ki, UNICEF-in Azərbaycandakı nümayəndəliyi fəaliyyətini mərhələli şəkildə dayandıracaq. Bu barədə məlumatları UNICEF-in Avropa və Mərkəzi Asiya üzrə Kommunikasiya İdarəsinin regional rəhbəri İrina Mazur AzadlıqRadiosuna da təsdiqləmişdi.
O bildirmişdi ki, bundan sonra UNICEF Azərbaycandakı tərəfdaşlarla əməkdaşlığı regional ofisi və baş qərargahı vasitəsilə davam etdirəcək.
UNICEF-in Azərbaycandakı Nümayəndəliyinin fəaliyyəti sentyabrın 3-dən etibarən dayandırılacaq. Bunu "Report"un sorğusuna cavab olaraq İ.Mazur bildirib.
Artıq bu məlumatlar Azərbaycanda bir çox sosial şəbəkə istifadəçilərinin narazılığı ilə müşahidə edilir. Onlar vurğulayırlar ki, Azərbaycanda onsuz da uşaq ölümləri yüksəkdir. Həmin şəxslərin narahatlıqlarına görə, UNICEF-in Azərbaycandakı fəaliyyətini mərhələli şəkildə dayandırması bu prosesə ancaq ziyan gətirəcək.
Rəsmi Bakı isə hesab edir ki, "Azərbaycan artıq yardım qəbul edən dövlətdən qlobal gündəliyə töhfə verən bir ölkəyə çevrilib".
Dünyanın 190 ölkəsində uşaq hüquqlarını dəstəkləyən və qoruyan təşkilat Azərbaycanda 1993-cü ildən fəaliyyyət göstərir.
Bakı Özbəkistan prezidentini alçaltmaqda ittiham olunan şəxsi Daşkəndə verib
Azərbaycan Özbəkistan prezidentini təhqir etməkdə ittiham olunan şəxsi Daşkəndə ekstradisiya edib.
Bu barədə bu gün, iyulun 25-də Azərbaycan Baş Prokurorluğu məlumat yayıb.
Məlumatda vurğulanır ki, Özbəkistanda prezidentin şərəf və ləyaqətini alçaltmaqda təqsirləndirilərək dövlətlərarası axtarışa verilmiş 1982-ci il təvəllüdlü Amonbek Yusupov bu ilin aprelində Azərbaycanda saxlanıb, barəsində həbs-qətimkan tədbiri seçilib: ""Mülki, ailə və cinayət işləri üzrə hüquqi yardım və hüquqi münasibətlər haqqında" 07.10.2002-ci il tarixli Konvensiyaya əsasən, təqsirləndirilən şəxsin ekstradisiyası haqqında qərar qəbul edilərək Ədliyyə Nazirliyinin Penitensiar Xidmətinin xüsusi konvoyunun müşayiəti ilə Özbəkistan Respublikasının səlahiyyətli orqanına təhvil verilib".
Bu qərara və ittihama A.Yusupovdan, onun yaxınlarından münasibət almaq mümkün olmayıb.
Özbəkistanda prezidentə təhqir və ya böhtan atmaq ittihamına görə məsuliyyəti müəyyən edən bənd ölkənin Cinayət Məcəlləsinə 2021-ci ilin martında salınıb. Bu maddə 3 ilədək islah işləri, azadlığın məhdudlaşdırılması və ya 5 ilədək azadlıqdan məhrumetmə cəzasını nəzərdə tutur.
Xatırlatma
Ötən il Azərbaycanla Özbəkistan arasında müttəfiqlik münasibətləri haqqında müqavilə imzalanıb. Yerli və beynəlxalq insan hüquqları təşkilatlarının hesabatlarında həm Özbəkistanda, həm də Azərbaycanda siyasi məhbuslardan da bəhs edilir. ABŞ Beynəlxalq Dini Azadlıq Komissiyasının hesabatına görə, Özbəkistanda 2 min dini və siyasi məhbus var. Azərbaycanda isə siyasi məhbusların sayı 270 civarında göstərilir. Amma hər iki ölkədə rəsmilər siyasi məhbusların olması ilə bağlı deyilənləri qəbul etmirlər. Onlar deyirlər ki, ölkələrində siyasi məhbus sayılan şəxslər sırf törətdikləri əmələ görə məsuliyyətə alınıblar.
55 milyon ziyan vurulub, onun 21 milyon manatı ödənilib
Prokurorluq orqanlarında ibtidai istintaqı yekunlaşmış cinayət işləri və tamamlanmış araşdırma materialları üzrə ümumilikdə 55 milyon 783 min manat maddi ziyan vurulduğu müəyyən edilib.
Bu, bu gün, iyulun 24-də Azərbaycan Baş Prokurorluğunda bu ilin birinci yarısında görülmüş işlərin yekunları və qarşıda duran vəzifələrə dair kollegiya iclasında bildirilib.
Habelə vurğulanıb ki, istintaq tədbirləri ilə onun 37.7 faizinin - 21 milyon 26 min manat hissəsinin ödənilməsinə nail olunub: "Habelə 13 milyon 788 min manat məbləğində əmlak üzərinə həbs qoyulub".
Baş Prokurorluğun məlumatına görə, ötən il isə ibtidai istintaqı yekunlaşmış cinayət işləri üzrə ümumilikdə 170 milyon 958 min manat maddi ziyan vurulduğu müəyyən edilib: "İstintaq tədbirləri ilə onun 44 faizinin, yəni 75 milyon 300 min manat hissəsinin ödənilməsinə nail olunmuş, habelə 33 milyon manatdan artıq məbləğdə əmlak üzərinə həbs qoyulub".
Xatırlatma
Azərbaycanda bir sıra müstəqil ekspertlər korrupsiya ilə mübarizəni yetərli saymırlar. Üstəlik, onların fikrincə, aşağı səviyyədə qanunsuzluqlara yol verən bir çox məmurlar məsuliyyətə cəlb edilsə də, onlar heç də həmişə cəzalarını axıra qədər çəkmir, müxtəlif yollarla vaxtından əvvəl azadlıqlarına qovuşurlar.
Tələbələrə verilən təqaüdlər artırılıb
Doktorantlara, ali təhsil, orta ixtisas və peşə təhsili müəssisələrində təhsil alan tələbələrə verilən təqaüdlər 10-60 AZN artırılıb.
Prezident İlham Əliyev bununla bağlı sərəncam imzalayıb.
Yeni sərəncamla doktorantlara, ali təhsil, orta ixtisas və peşə təhsili müəssisələrində təhsil alan tələbələrə verilən təqaüdlərin maksimumu 450, minimum məbləği (peşə təhsilində) isə 70 manata çatdırılıb.
Tələbələr üçün Prezident təqaüdü də artırılıb. Bu məbləğ 2025-ci il sentyabrın 1-dən 350 manat müəyyən edilib. Hazırda bu 275 manatdır.
Bundan əvvəl sonuncu dəfə Azərbaycanda tələbələrin təqaüdləri 2023-cü il yanvarın 1-də artmışdı. Rəsmi statistikaya görə, bu illər ərzində Azərbaycanda rəsmi inflyasiya illər üzrə birrəqəmli olub. Amma müstəqil iqtisadçılar rəsmi açıqlanan inflyasiya göstəricisinə şübhə ilə yanaşırlar. Hazırda adlarının çəkilməsini istəməyən bir çox tələbə də AzadlıqRadiosuna deyib ki, faktiki aldıqları təqaüdlər onların ehtiyaclarının yalnız kiçik bir hissəsini ödəyir.
Xatırlatma
Bu il iyulun 1-də Azərbaycanda bəzi müavinət və təqaüdlər də 20 faiz civarında artırılıb. Amma bu ilin əvvəlində Azərbaycanda limitdən asıl olaraq bəzi kommunal xidmətlər (qaz və işıq) də bahalaşmışdı.
33 təhsil müəssisəsinin rəhbəri vəzifədən çıxarılıb
Abşeron-Xızı Regional Təhsil İdarəsi üzrə 33 təhsil müəssisəsinin rəhbəri tutduğu vəzifədən azad olunub.
Bu barədə Maliyyə Nazirliyinin məlumatında bildirilir.
Məlumatda qeyd edilir ki, Abşeron-Xızı Regional Təhsil İdarəsində dövlət büdcəsindən ayrılmış vəsaitlərin təyinatı üzrə xərclənməsi yoxlanılıb. Nəzarət tədbirləri idarənin tabeliyindəki 103 ümumi, altı məktəbdənkənar və 96 məktəbəqədər təhsil müəssisəsini əhatə edib.
Açıqlamaya görə, bəzi təhsil müəssisələrində dərnək və dərsdənkənar məşğələlərin təşkilində, dərslərin əvəzolunması ilə bağlı əməkhaqqının ödənilməsində, ştatların müəyyən olunmuş normalara uyğun saxlanılmasında, eləcə də qida təchizatında nöqsanlar aşkar edilib: "205 təhsil müəssisəsində son üç il üzrə aparılmış nəzarət tədbirləri ilə aşkar olunan nöqsan və çatışmazlıqlara əsasən müəyyənləşdirilmiş 594.6 min manat vəsait cavabdeh şəxslər tərəfindən dövlət büdcəsinə bərpa edilib. İnzibati xəta törətmiş 26 vəzifəli şəxs isə inzibati məsuliyyətə cəlb edilərək cərimə olunub".
Habelə bildirilir ki, nöqsanlara yol vermiş 134 vəzifəli şəxsə əmək qanunvericiliyinə uyğun olaraq intizam tənbehi (şiddətli töhmət, töhmət, xəbərdarlıq) verilib, altı rəhbər şəxslə bağlanılmış əmək müqaviləsinə xitam verilməsi nəzərdə tutulur: "Bununla yanaşı, Abşeron-Xızı Regional Təhsil İdarəsi üzrə aparılan nəzarət tədbirləri nəticəsində aşkar edilmiş maliyyə pozuntuları və digər nöqsanlara görə 33 təhsil müəssisəsinin rəhbəri tutduğu vəzifədən azad olunub".
Rəhbərləri çıxarılan təhsil müəssisələrinin adı çəkilmir. Yoxlamanın nəticələrinə Abşeron-Xızı Regional Təhsil İdarəsi və işdən çıxarılan şəxslərin münasibəti, hələlik, bəlli deyil.
Dövlət Maliyyə Nəzarəti Xidməti bildirir ki, ölkənin digər Regional Təhsil İdarələrində də bənzər halların araşdırılması istiqamətində tədbirlər həyata keçirilir.
Azərbaycanda 4 mindən çox orta məktəb, 150 civarında dövlət məktəbdənkənar, min 670-ə yaxın isə məktəbəqədər təhsil müəssisəsi fəaliyyət göstərir. Azərbaycanda hər üç uşaqdan yalnız biri məktəbəqədər təhsil alır.
Neft Fondunun AÇG-dən gəlirləri azalıb
Bu ilin yanvar-iyun aylarında Azərbaycan Dövlət Neft Fonduna (ARDNF) "Azəri-Çıraq-Günəşli" (AÇG) yataqlar blokundan 4 milyard 427 milyon manat vəsait daxil olub.
Bu barədə iyulun 23-də həmin fonddan məlumat yayılıb.
Məlumata görə, bu göstərici ötən ilin eyni dövrü ilə müqayisədə 682 milyon manat və ya 13.3 faiz azdır. Ötən illə müqayisədə neftin dünya bazar qiymətlərində ucuzlaşma var. Üstəlik, Azərbaycanda neft hasilatı da azalır.
Amma ARDNF-nin özünün vəsaiti artıb. Bu ilin iyunun sonuna Fondun aktivləri 66.5 milyard ABŞ dollarına çatıb. ARDNF-nin aktivləri ilin əvvəli ilə müqayisədə 10.8% artıb.
Azərbaycanın ümumi valyuta ehtiyatları isə 77 milyard dolları ötüb. (onun 11 milyardı Mərkəzi Bankın aktivləridir)
Bu ilin yanvar-iyun aylarında Fondun gəlirləri 8.8 milyard manat, xərcləri isə 7.3 milyard manat təşkil edib.
31 il öncə, 1994-cü ildə Azərbaycan hökuməti beynəlxalq təşkilatlarla AÇG yataqlar blokunun istismarı ilə bağlı saziş imzalayıb. 2017-ci il sentyabrın 14-də bu müqavilənin müddəti 2050-ci ilə qədər uzadılıb.
Xatırlatma
ARDNF 1999-cu ildə yaradılıb, 2001-ci ildə fəaliyyətə başlayıb.
İndiyə kimi Neft Fonduna 207 milyard dollardan çox vəsait daxil olduğu bildirilir. Bu vəsaitlərin böyük bir hissəsi büdcə transfertlərinə və bir çox layihələrin reallaşmasına xərclənib. Amma müxalifətin iddialarına görə, həmin vəsaitin bir hissəsi də korrupsiyanın yemi olub. Rəsmilər isə belə iddiaları əsassız sayırlar.
ABŞ konqresmeni iqtisadçı Qubad İbadoğluya azadlıq istəyir
ABŞ Nümayəndələr Palatasının respublikaçı üzvü Kris Smit iqtisadçı-professor Qubad İbadoğlunun azadlığının təmin olunmasına çağırır. O, iqtisadçının haqsız həbsinin ikinci ildönümündə belə bir çağırışla çıxış edib.
Tom Lantos İnsan Hüquqları Komissiyasının həmsədri olan K.Smit Q.İbadoğlu barəsində saxta pul ittihamının absurd sayıldığını vurğulayır, onun və bütün siyasi məhbusların şərtsiz azad edilməsini Tramp administrasiyasının Qafqazda sülhün təşviqi yönündə "ən önəmli" prioriteti sayır.
"Dr. İbadoğlunun sağlamlığı pisləşdikcə, hökumət onu həbsxanadan ev həbsinə keçirdi, amma intiqam kampaniyası davam etdi, hətta gücləndi – ona tibbi xidmətlər ciddi şəkildə məhdudlaşdırıldı və nəzarət altında saxlandı", – K.Smit yazır.
Konqresmen Q.İbadoğlunun qardaşının da "rejimin repressiyaları"ndan yan keçmədiyini, polis nəzarətində olduğunu yazır, məqsədin iqtisadçını dəstəkləmək və müdafiə etmək istəyənləri qorxutmaq olduğunu bildirir.
"Tramp administrasiyasının onun və digər siyasi məhbusların azadlığı üçün çalışmasını yüksək qiymətləndiririk. Mən dövlət katibi Rubioya müraciət edirəm ki, təcili və qətiyyətlə hərəkət edərək Dr. İbadoğlunun həbsinə və tibbi zorakılığa görə məsuliyyət daşıyan şəxslərə qarşı hədəfli "Maqnitski" insan hüquqları və korrupsiya sanksiyalarının tətbiqini nəzərdən keçirsin", – konqresmen vurğulayır.
Xatırlatma
Q.İbadoğlu 2023-cü il iyulun 23-də həbs edilib, saxta pul hazırlamaqda ittiham olunub. Onun təşkilatının ofisindən 40 min dollar tapıldığı, bunun bir hissəsinin saxta olduğu iddia edilib. Təqsirləndirilən professor isə bu pulların ofisə elə hüquq-mühafizə orqanlarının əməkdaşları tərəfindən atıldığını bəyan edib. İstintaqın gedişində Q.İbadoğluya Cinayət Məcəlləsinin 167-3.1-ci (dini ekstremist materialları hazırlama, saxlama, yayma) maddəsiylə ittiham verilsə də, o bu ittihamı da qəbul etməyərək cinayət işində yazılanların yalanlayıb.
Q.İbadoğlu ötən il aprelin 22-də ev dustaqlığına buraxılıb, daha sonra onun haqqında polis nəzarətinə vermə qətimkan tədbiri seçilib. Avqustda isə onunla bağlı cinayət işi ümumi işdən ayrılıb.
Q.İbadoğluya qarşı cinayət işi çərçivəsində saxlanmış iqtisadçı Fazil Qasımova isə 9 il həbs cəzası kəsilib.
Q.İbadoğlunun qardaşı Qalib Bayramova qarşı bu il cinayət işi açılıb.
Azərbaycan hakimiyyəti ölkədə siyasi motivli həbslərin olmadığını bildirir.
Yaxınları: 'Hacı Vəliyev aclığı dayandırıb'
Fəaliyyətini dayandıran "Gənc Qazilər" İctimai Birliyinin (İB) həbsdə olan sədri Hacı Vəliyevin aclıq aksiyasını dayandırdığı bildirilir.
Bu barədə iyulun 22-də onun yaxınları məlumat yayıb.
Məlumatda bildirilir ki, Vəliyev qərarını ailəsinin təkidi və səhhətində yaranan ciddi problemlərlə izah edib: "Hacı Vəliyev saxlanma şəraitindən və gözündəki ciddi problemin hələ də müalicə olunmamasından narazılığını ifadə edib. Uzunmüddətli aclıq aksiyasının onun fiziki və psixoloji vəziyyətinə dərin mənfi təsir göstərdiyi aydındır. Bu, artıq geri dönməz fəsadlara səbəb ola bilər".
Bu məlumata Penitensiar Xidmət və ya başqa rəsmi qurumlardan münasibət almaq mümkün olmayıb.
Vəliyev iyunun 21-dən "ədalətsiz mühakiməsinə qarşı" aclıq aksiyasına başladığını açıqlamışdı. Daha əvvəl vəkilləri onun yeriməkdə çətinlik çəkdiyini, səhhətinin ağırlaşdığını bildirmişdilər.
Vəliyev İkinci Qarabağ müharibəsində gözlərinin birini itirib. Onun digər gözündə də problem yarandığı söylənirdi.
H.Vəliyev Cinayət Məcəlləsinin 221.3-cü (Silahdan və ya silah qismində istifadə olunan əşyalardan istifadə edilməklə xuliqanlıq...) və 186.1-ci (Özgənin əmlakını qəsdən məhv etmə və ya zədələmə - zərərçəkmiş şəxsə xeyli miqdarda ziyan vurmaqla törədildikdə) maddələri ilə ittiham olunur.
Xatırlatma
H.Vəliyev bu il aprelin 1-də həbs edilib. İttihami qəbul etmir. Onun həbsindən sonra "Gənc Qazilər" İB-nin fəaliyyətini dayandırdığı açıqlanıb. Bu barədə həmin qurum adından yayılan məlumatda qeyd olunub ki, son dövrlər yaranmış bir sıra obyektiv, subyektiv səbəblər, o cümlədən üzvlər arasında əlaqələrin zəifləməsini nəzərə alaraq, təşkilatın fəaliyyəti ilə bağlı geniş müzakirələr aparılıb: "Yekun nəticə olaraq, birliyin fəaliyyətinin bu mərhələdə dayandırılmasının daha məqsədəuyğun olduğu qənaətinə gəlmişik".
H.Vəliyev sosial şəbəkələrdə tənqid çıxışları ilə də tanınırdı. O, xüsusilə İkinci Qarabağ müharibəsindən sonrakı dövrdə döyüşlərdə sağlamlığını itirmiş hərbçilərin və ya həlak olanların ailələrinin problemlərini ictimailəşdirib.
"Gənc Qazilər" İB 2021-ci ildə "Qarabağ Qaziləri" İB-nin əsasında yaradılmışdı.
Azərbaycanda uçot dərəcəsi son bir ildə ilk dəfə endirildi
Azərbaycan Mərkəzi Bankı (AMB) uçot dərəcəsini son bir ildə ilk dəfə endirib. Qurumun bu gün, iyulun 23-də açıqlanan qərarına görə, uçot dərəcəsi 7 faizə, faiz dəhlizinin aşağı həddi 6-ya, yuxarı həddi isə 8-ə endirib.
"Qərar faktiki inflyasiyanın proqnoz inflyasiyasının trayektoriyasına uyğunluğu və onun hədəflə (4±2%) müqayisəsi, son qlobal iqtisadi proseslər, daxili makroiqtisadi vəziyyət, valyuta bazarında davam edən sabitlik, həmçinin pul siyasəti qərarlarının ötürücülüyü nəzərə alınmaqla qəbul edilib", - Mərkəzi Bank bildirir.
Mərkəzi Bank 2024-cü ilin mayından etibarən uçot faiz dərəcəsini (7.25) sabit saxlayıb.
Mərkəzi Bank inflyasiya proqnozunu açıqlayıb
AMB 2025-ci il və 2026-cı ildə illik inflyasiyanın hədəf daxilində olacağını proqnozlaşdırır.
Qurum vurğulayıb ki, baza ssenarisi üzrə iyul proqnozlarına görə, illik inflyasiyanın 2025-ci ildə 5.7, 2026-cı ildə isə 5.3 faiz olacağı gözlənilir.
Bundan əvvəl Dövlət Statistika Komitəsi açıqlamışdı ki, iyunda son bir illə müqayisədə inflyasiya 6 faiz olub. Müstəqil iqtisadçılar isə bu rəqəmə şübhə ilə yanaşaraq onun reallıqda ikirəqəmli olduğunu düşünürlər. Onlar habelə hesab edirlər ki, Azərbaycanda uçot dərəcəsinin müəyyən edilməsi bir qədər formal xarakter daşıyır. Həmin şəxslər deyir ki, uçot dərəcələri dəyişəndə belə bu bank faizlərinə təsir etmir. Əslində uçot dərəcəsi aşağı olarsa, kredit faizləri aşağı düşməlidir. Müstəqil ekspertlər vurğulayırlar ki, ölkədə iqtisadi institutlar zəif olduğu üçün Mərkəzi Bankın və onun faiz dərəcəsinin iqtisadiyyatda ciddi rol almasında problemlər var.
İctimai fəalın şikayəti təmin edilməyib
Bu gün, iyulun 22-də Bakı Apellyasiya Məhkəməsində ictimai fəal Anar Abdullanın həbsindən verilən şikayətə baxılıb. Prosesdə Binəqədi rayon Məhkəməsinin qərarı qüvvədə saxlanaraq şikayət təmin edilməyib.
Bu barədə onun yaxınları məlumat verib.
A.Abdulla iyulun 11-də Binəqədi rayon Məhkəməsinin qərarı ilə inzibati qaydada 30 sutka həbs edilib. O, İnzibati Xətalar Məcəlləsinin 510-cu (xırda xuliqanlıq) və 535.1-ci (polisin qanuni tələblərinə tabe olmamaq) maddələri ilə təqsirli bilinib.
A.Abdulla məhkəməsində bildirib ki, Atatürk Prospektində avtobusdan düşəndə saxlanılıb və heç bir inzibati xəta törətməyib.
A.Abdulla Seçkilərin Monitorinqi və Demokratiyanın Tədrisi Mərkəzinin (SMDT) sədri Anar Məmmədli ilə birlikdə cinayət işinə də cəlb olunub. O, qaçaqmalçılıq da daxil olmaqla səkkiz maliyyə cinayəti əməlində ittiham olunur. Barəsində polisin nəzarətinə vermə-qətimkan tədbiri seçilib.
Xatırlatma
SMDT rəhbəri A.Məmmədli ötən il aprelin 29-dan həbsdədir. Ona qarşı öncə Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülsə də, istintaqın sonunda qanunsuz sahibkarlıq, cinayət yoluyla əldə edilmiş əmlakın leqallaşdırılması, vergidən yayınma və s. maddələrlə ittiham ağırlaşdırılıb. Həmin maddələrdə 12 ilədək həbs cəzası nəzərdə tutulub.
Hüquq müdafiəçilərinin hesabatına görə, hazırda Azərbaycanda 370-dən çox siyasi məhbus var. Azərbaycan hakimiyyəti isə ölkədə siyasi iradəsinə görə insanların təqib olunmadığını bildirir və siyasi məhbusların olmasını qəbul etmir.
Azərbaycanın dövlət borcu azalıb, amma artacağı gözlənir
2025-ci il iyulun 1-də Azərbaycanın cəmi xarici və daxili borcu 25 milyard 695 milyon manat təşkil edib.
Bu barədə Azərbaycan Maliyyə Nazirliyindən bildirilib.
2025-ci ilin dövlət büdcəsində dövlət borcuna və öhdəliklərinə xidmətlə bağlı 2 milyard 399.6 milyon manat xərclər nəzərdə tutulur. 2025-ci il dövlət büdcəsinin xərcləri 41 milyard 407 milyon 600 min manat proqnozlaşdırılır. Büdcənin gəlirləri isə 38 milyard 356 milyon manat təşkil etməlidir.
Cəmi borcun təqribən 17 milyard 177 milyon manatı daxili, 5 milyard 10.7 milyon ABŞ dolları (8 milyard 518.19 milyon manat) isə xarici borcun payına düşür.
Ölkənin cəmi borcu bu ilin əvvəli ilə müqayisədə 6.2 faiz və ya 1 milyard 684.6 milyon manat azalıb.
Amma 2025-ci ilin sonuna Azərbaycanın dövlət borcunun (xarici və daxili) ümumi məbləğinin 29 milyard manata çatacağı gözlənilir. Bu barədə də elə üç ay əvvəl, aprelin 15-də Maliyyə Nazirliyinin yaydığı açıqlamada bildirilirdi. Üstəlik, qeyd edilirdi ki, ortamüddətli (2026-2029) dövrün sonuna Azərbaycan dövlət borcunun ümumi məbləğinin 32.7 milyard manata çatacağı proqnozlaşdırılır.
Halbuki, bir neçə il öncə rəsmilər çıxışlarında, bir qayda olaraq, vurğulayırdılar ki, hökumətin qarşısına qoyduğu əsas məqsədlərdən biri dövlət borcunu azaltmaqdır.
Əli Kərimlinin mühafizəçisinin həbs müddəti uzadılıb
Azərbaycan Xalq Cəbhəsi Partiyasının (AXCP) sədri Əli Kərimlinin mühafizəçisi Kənan Zeynalovun (Basqal) həbs müddəti daha 2 ay uzadılıb.
İyulun 21-də bununla bağlı Suraxanı rayon Məhkəməsi istintaq qurumunun vəsatətini təmin edib.
K.Basqalın yaxınlarının sözlərinə görə, prosesdə iştirak edən müstəntiq həbs müddətinin artırılması ilə bağlı vəsatəti müdafiə edib və bunu istintaqın hələ başa çatmaması ilə izah edib.
Müdafiə tərəfi isə bununla razı olmayıb. Onlar hesab edirlər ki, K.Basqalın həbsdə olduğu bu 4 ayda istintaq hərəkətı aparılmayıb.
Lakin hakim istintaq orqanının vəsatətini təmin edib.
"Üstəlik, Kənan Basqalın ailə üzvləri ilə görüşünə qanunsuz olaraq qadağa qoyulub", - onun yaxınları AzadlıqRadiosuna bildiriblər.
Bu deyilənlərə cavabdeh rəsmi qurumlardan münasibət almaq mümkün olmayıb.
K.Basqal bu il martın 21-də saxlanıb. O, Bakının Suraxanı rayonu Yeni Günəşli qəsəbəsində 36 yaşlı bir şəxsi qarın nahiyəsindən bıçaqlamaqda ittiham edilir. K.Basqal ittihamı qəbul etmir və şərləndiyini bəyan edib.
Xatırlatma
Müxalifətdə olan AXCP-nin hazırda 15-ə yaxın üzvü həbsdədir. Onlar müxtəlif ittihamlarla üzləşsələr də, partiya onların hamısının siyasi sifarişlə həbs edildiyini açıqlayıb. Onlardan bir neçəsinin də elə AXCP sədrinin ictimai əsaslarla mühafizəçisi olduğu bildirilir.
Bəzi yerli hüquq-müdafiə təşkilatlarının hazırladıqları siyahıya görə, hazırda Azərbaycan həbsxanalarında 370-dən çox siyasi məhbus var. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Xalq Cəbhəsi üzvünün həbsdə təxribatla üzləşdiyi deyilir
Azərbaycan Xalq Cəbhəsi Partiyası (AXCP) Təşkilat şöbəsinin həbsdə olan müdir müavini Elxan Əliyevin 17 saylı Cəzaçəkmə Müəssisəsində (CÇM) təxribatla üz- üzə qaldığı bildirilir.
Bu barədə həmin partiyadan məlumat verilib.
Partiya yoldaşlarının deməsinə görə, bir müddət əvvəl 6 saylı CÇM- dən yeri dəyişdirilmiş E.Əliyevin gününü 17 saylı CÇM-də, sözün əsl mənasında, qara edirlər.
"Elxan bəy ailəsinə bildirib ki, müəssisəyə gəldiyi gündən rəhbərlik tərəfindən ayrıseçkiliyə məruz qalır. Belə ki, Elxan bəyə salam verən, onunla yaxınlıq edən dustaqlara müəssisə rəhbərliyi xəbərdarlıq edib, töhmət verir . Bundan başqa, digər dustaqları Elxan bəyin üstünə qaldırırlar ki, Elxan bəy aqressiv cavab versin. Bununla da Elxan bəyi təxribata çəkib daha ağır cəza versinlər. İş o yerə çatıb ki, Elxan bəy normal qidalana da bilmir...", - AXCP-dən bildirilib.
AXCP-dən vurğulanıb ki, bu cür münasibət insult keçirmiş E.Əliyev üçün həyatı təhlükə yaradır: "Elxan bəyin verdiyi məlumata görə, bütün bunların başında Penitensiar Xidmətin rəisi Mirsaleh Seyidov durur. Məhz onun tapşırığı əsasında o hər gün təxribatla üz-üzə qalır".
Bu deyilənlərə Penitensiar Xidmət və başqa rəsmi qurumlardan münasibət almaq mümkün olmayıb. Amma bu xidmətdən, bir qayda olaraq, iddia edirlər ki, onlar məhbuslarla qanun çərçivəsində davranırlar.
Dələduzluqda ittiham edilən E.Əliyev ötən il Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi ilə 5 il həbs cəzası alıb. O, ittihamı qəbul etmir.
Xatırlatma
Müxalifətdə olan AXCP-nin hazırda 15 civarında üzvü uzunmüddətli həbsdədir. Üstəlik, bir çox fəalları inzibati qaydada həbs edilib. Onlar müxtəlif ittihamlarla üzləşsələr də, partiya onların hamısının siyasi sifarişlə həbs olunduğunu açıqlayıb. Azərbaycan rəsmiləri isə ölkədə siyasi məhbus olması ilə bağlı deyilənləri qəbul etmirlər. Onlar vurğulayırlar ki, siyasi məhbus siyahısında yer alan şəxslər sırf törətdikləri əmələ görə mühakimə ediliblər.
Bəzi hüquq müdafiəçilərinin hesablamalarına görə, hazırda Azərbaycanda 370-dan çox siyasi məhbus var.
Əliyev: 'Bizim ərazidə heç bir icarədar ola bilməz'
Prezidenti İlham Əliyev iyulun 19-da III Şuşa Qlobal Media Forumda Ermənistanın Sünik bölgəsindən keçəcək yolla bağlı ABŞ-dən təklif gəlməsi və buna Ermənistanın münasibəti ilə bağlı suala cavab verib.
İ.Əliyev vurğulayıb ki, əslində bu sual Ermənistan rəhbərliyinə ünvanlanmalıdır: "Bizim ərazidə heç bir operator, heç bir ticarətçi, heç bir icarədar ola bilməz. Ermənistan nə etmək istəyir? Onlar çox şey edə bilərlər, mənim bundan xəbərim yoxdur".
Əliyevin sözlərinə görə, onlar üçün isə "ən başlıca məsələ odur ki, ...Azərbaycandan Azərbaycana maneəsiz və təhlükəsiz keçid olmalıdır".
Bugünlərdə Ermənistan baş naziri Nikol Paşinyan da Sünik (Zəngəzur) yolu ilə bağlı ABŞ-dən təkliflər aldıqlarını təsdiqləmişdi.
Onun deməsinə görə, Ermənistan təkcə ABŞ-dən deyil, digər dost ölkələrdən də müxtəlif təkliflər alıb və almaqda davam edir. "Çox vacib bir məqam var – müzakirə olunan bütün məsələlər Ermənistan Respublikasının ərazi bütövlüyü, suverenliyi və yurisdiksiyası əsasında aparılır", –N.Paşinyan vurğulayıb.
ABŞ-nin Türkiyədəki səfiri Tom Barrak iyulun 13-də Nyu-Yorkda jurnalistlərə bildirib ki, ölkəsi Naxçıvanla Azərbaycanın qalan hissəsini birləşdirəcək yolu 100 il müddətinə icarəyə götürmək təklifini edib.
Azərbaycan hökuməti Naxçıvanla quru əlaqəsini nəzərdə tutan, Ermənistanın Sünik ərazisindən keçməli olan yola "Zəngəzur dəhlizi" deyir. Ermənistan tərəfi isə bunu ərazi iddiası adlandırır.
Ermənistanla kommunikasiya xətlərinin açılması məsələsi əvvəllər sülh sazişi layihəsində yer alsa da, tərəflər 2024-cü ilin avqustunda bəyan etdi ki, bu müddəa qarşılıqlı razılıq əsasında layihədən çıxarılıb.
Xatırlatma
Ötən əsrin 80-ci illərində gərginləşən Qarabağ münaqişəsi Azərbaycan və Ermənistan arasında toqquşmalara səbəb olub. 1990-cı illərin əvvəllərində Azərbaycanın Qarabağ bölgəsi, ətraf 7 rayonu işğal edilib. 2020-ci ildə 44 günlük müharibə və 2023-cü ildə birgünlük hərbi əməliyyatlar nəticəsində Bakı bütün ərazilərində suverenliyini bərpa edib.
Son illər iki ölkə arasında müxtəlif formatlarda danışıqlar aparılsa da, hələlik, sülh sazişi imzalanmayıb. Bununla belə, tərəflər bu ilin martında saziş üzrə bütün maddələrin razılaşdırıldığını açıqlayıblar.
