Müdafiə Nazirliyinin Daxili Təhlükəsizlik, eləcə də Hərbi Təhsil və Tədris İdarəsinin sabiq baş zabiti, “Nəcməddin Sadıxovun yaxın adamı” kimi tanınan Zahid Niftəliyevə 12 həbs cəzası verilib. İyulun 30-da Bakı Ağır Cinayətlər Məhkəməsində ona hökm oxunub.
O, külli miqdarda mənimsəmə, məhkəmə qərarını icra etməmə kimi əməllərdə təqsirli bilinib. İddia olunur ki, Z.Niftəliyev 2016-cı ildə məqsədli şəkildə “Shahin Co” adlı şirkət yaradıb. Şirkətin maliyyə durumu, təsərrüfat fəaliyyəti haqda “Ata Bank”a yalan məlumatlar yazılmış sənədlər təqdim etməklə 42,5 milyon manat kredit götürərək mənimsəyib. Kredit ödənilməyəndə bank mülki qaydada məhkəməyə müraciət edib. Məhkəmə pulun ödənilməsi barədə qərar çıxarsa da, icra olunmayıb.
"42 milyonu mənə kim idi verən?"
Lakin Z.Niftəliyev özünü təqsirli bilmir. O, məhkəmədə ifadəsində də deyib ki, bankdan götürülən puldan 1 manat da ona çatmayıb. Onun sözlərinə görə, “Ata Bank”dan iri məbləğdə kreditin götürülməsi general N.Sadıxovla mərhum Vergilər naziri Fazil Məmmədov arasında razılaşdırılmış məsələ idi. Onun adından formal şəkildə istifadə olunub: “42 milyonu mənə kim idi verən? Mən də bu işə ona görə girdim ki, dedilər, dövlət üçün iş görülür. Sonradan bidim ki, başımın üstündən iş görüblər. Deyə bilmərəm ki, bu pulu Nəcməddin yeyib, Fazil yeyib. Nəcməddin gəlsin bura, özü desin...”
Hökmdən öncə Z.Niftəliyevin vəkili Əli Adıgözəlov da gileylənib ki, məhkəmədə hərtərəfli, obyektiv araşdırma aparılmadı. Onun sözlərinə görə, bu cinayət işi üzrə ədalətli qərar çıxarmaq üçün mütləq general N.Sadıxov dindirilməliydi:
“Bu işdə əsas fiqur Nəcməddin Sadıxov olub. Təəssüf edirəm ki, onu məhkəmədə dindirə bilmədik. Dindirsəydik, ondan soruşardıq ki, Zahid Niftəliyevi banka niyə göndərmişdin? Bu məsələdə Fazil Məmmədovun da rolu var. Ümumiyyətlə, müdafiə tərəfi olaraq, çoxsaylı suallarımız cavabsız qaldı”.
Z.Niftəliyev özü də son sözündə təqsirsiz olduğunu vurğulayıb və bəraət istəyib.
Əvvəlki cəza ilə birləşdirilib
“Şlyapa Zahid” ləqəbiylə tanınan Z.Niftəliyev 2022-ci ildə rüşvət ittihamıyla həbs olunub. O, N.Sadıxovla əlaqələrindən sui-istifadə edərək, rüşvət alıb, müəyyən adamların xidmət yerini dəyişməkdə, ordudan tərxis etdirməkdə suçlanırdı.
Tərtər Hərbi Məhkəməsi onu 2023-cü ilin yayında 10 min manat cərimə cəzası ilə azadlığa buraxsa da, noyabrda Gəncə Apellyasiya Məhkəməsi yenidən onun həbsinə qərar verib. Z.Niftəliyev 8 il 6 ay azadlıqdan məhrum edilib.
Z.Niftəliyevin N.Sadıxovla yaxın münasibətlərinin olması cinayət işinin materiallarında, ifadələrdə də əksini tapıb.
İyulun 30-da çıxarılan hökmdə Z.Niftəliyevin haqqında əvvəlki hökm üzrə cəzası da birləşdirilməklə ona 12 il həbs cəzası kəsilib.
O, əvvəlki iş üzrə də özünü təqsirli bilmir, deyirdi ki, qərar verən şəxs olmayıb, kiminsə iş yerini dəyişmək, ordudan vaxtından əvvəl tərxis eləmək kimi işlər onun səlahiyyətində deyildi. Hətta vəsatət qaldırmışdı ki, Müdafiə naziri Zakir Həsənov dindirilsin.
General-polkovnik N.Sadıxov 1993-2020-ci illərdə Azərbaycan Ordusunun Baş Qərargah rəisi olub. Onun adı son illərdə Azərbaycanda Tərtərdə hərbçilərə qarşı işgəncələr, Müdafiə Nazirliyi sistemində 143 milyon manatlıq mənimsəmə və başqa cinayət işlərindəki ifadələrdə çəkilir. Müxtəlif məhkəmə iclaslarında onun dindirilməsi barədə vəsatətlər qaldırılsa da, bunların heç biri təmin olunmayıb.
N.Sadıxov da ünvanına səslənən ittihamlara cavab verməyib.
