ABŞ prezidenti Donald Tramp Şotlandiyada Avropa Komissiyasının prezidenti Ursula Fon der Lyayenlə danışıqlardan sonra ABŞ və Avropa İttifaqı arasında ticarət razılaşmasının əldə olunduğunu bildirib.
Trampın sözlərinə görə, ABŞ-yə Avropa İttifaqından (Aİ) idxal olunan mallara tətbiq olunacaq rüsumlar onun əvvəlcə bəyan etdiyi kimi 30% deyil, 15% olacaq. ABŞ prezidenti əldə olunan razılaşmanı "özünəməxsus bir tərəfdaşlıq" adlandırıb.
ABŞ prezidentinin sözlərinə görə, bu "özünəməxsus tərəfdaşlıq" çərçivəsində Avropa İttifaqı ABŞ-dən 750 milyard dollar dəyərində enerji resursları almağa, ABŞ iqtisadiyyatına daha 600 milyard dollar investisiya qoymağa, həmçinin ABŞ-dən "külli miqdarda" silah almağa razılıq verib.
Trampın ticarət sazişləri üçün verdiyi müddət avqustun 1-də başa çatır, bundan sonra Vaşinqtonla razılığa gələ bilməyən ölkələr və ya birliklərə qarşı yüksək ticarət rüsumları tətbiq olunacaq.
Avropa Komissiyasının prezidenti Ursula Fon der Lyayen Trampla görüş üçün onun Şotlandiyanın cənub-qərbindəki Törnberri qolf klubuna gəlib. Görüşdən əvvəl onlar jurnalistlərə razılığa gəlməyə ümid etdiklərini bildiriblər. Eyni zamanda, Tramp daha əvvəl belə razılaşma ehtimalını "50-yə 50" qiymətləndirmişdi. Ursula Fon der Lyayen də görüşün əvvəlində eyni qiymətləndirməni verərək bildirib ki, razılaşma əldə olunacağı halda bu, ABŞ və Aİ arasında indiyədək bağlanmış "ən mühüm saziş" olacaq.
Dünya üzrə mal və xidmətlər ticarətinin təxminən üçdə biri ABŞ və Avropa İttifaqının payına düşür. Aİ-nin ABŞ-yə ixracı ABŞ-dən Avropaya ixracdan xeyli çoxdur (ötən ilin statistikasına görə, 370 milyard dollar ixraca qarşı 606 milyard dollar idxal) və Tramp bu ticarət balanssızlığını ciddi problem hesab edir. O, əgər razılaşma əldə olunmasa, avqustun 1-dən Avropa mallarına 30%-lik tarif tətbiq edəcəyi ilə hədələyirdi.
Aİ əvvəlcə ABŞ-nin rüsumlarına cavab tədbirləri hazırlamışdı. Bu tədbirlər Tramp administrasiyasının apreldə əksər ölkələrə qarşı yüksək rüsum qərarını donduraraq onlarla danışıqlara başlamaq qərarından sonra dayandırıldı. ABŞ indiyədək yalnız bir neçə ölkə ilə ticarət razılaşması əldə edə bilib.