"Asriran" xəbər agentliyi iyulun 24-də İran prezidenti Məsud Pezeşkianın çıxışına istinadən xəbər verir ki, Tehran o qədər ciddi su çatışmazlığı ilə üzləşib ki, onun 15 milyonluq əhalisi köçmək məcburiyyətində qala bilər.
"Vəziyyət ciddidir və Tehranın artıq suyu qalmayıb", - prezident Pezeşkian bildirib. O, fövqəladə həll yolu kimi paytaxtın köçürülməsi variantının istisna edilə bilməyəcəyini də vurğulayıb.
İranın 31 əyalətindən 20-dən çoxunda su böhranı yaşayır. Dövlət xəbər agentliyi - IRNA ən böyük su anbarlarından birinin növbəti dörd həftə ərzində tamamilə quruyacağını yazıb.
Ölkəboyu yeddi su anbarında suyun səviyyəsi 10 faizdən aşağı düşüb. Cənubdakı Hörmüzqan və Fars vilayətlərində iki bənd tamamilə quruyub və ölkə daxilində su anbarlarının 80 faizi, demək olar ki, boş qalıb.
İqlim mütəxəssislərinin sözlərinə görə, qarşıdakı iki ay ərzində normal su təchizatı mümkün olmayacaq və vəziyyət ilin sonuna doğru yağıntılarla yüngülləşə bilər.
Prezident M.Pezeşkian cari böhranın səbəblərindən biri kimi illərlə davam edən quraqlığı vurğulayıb. O, eyni zamanda əvvəlki hökumətin bu problemə məhəl qoymadığını deyərək tənqid edib.
Böhran səbəbindən hökumət idarələri və məktəblər azı şənbə gününə qədər bağlı qalacaq. Su qıtlığı və enerji təchizatı böhranı nəticəsində bir çox fabriklər bağlanıb və kütləvi ixtisarların olacağı gözlənilir.
Tənqidçilər mərkəzi hökuməti və vilayət rəhbərliklərini hava şəraiti ilə bağlı problemləri idarə etməkdə səriştəsizlikdə ittiham edir. Tehranın bir çox sakini artıq paytaxtı tərk edərək su təchizatı problemi yaşanmayan Xəzər dənizi sahilindəki şimal vilayətlərinə köçüb.
